د افغانستان اسلامي امارت د رياست الوزرا اداري مرستيال مولوي عبدالسلام حنفي پرون ماسپښین د فاریاب ولایت قیصار او شیرین تګاب ولسوالیو له یو شمېر سیمهییزو مسولینو، علماوو او مجاهدینو سره لیدنه وکړه.
په پیل کې د قیصار ولسوال ملا محمد اسماعیل سعادت او د شیرین تګاب ولسوال د نورو په استازیتوب خبرې کړې او د دې ولایت په ځانګړي ډول قیصار او شیرین تګاب ولسوالیو کې یې د اجتماعي او امنیتي وضعیت او سیمه ییزې حکومتولۍ په اړه د ریاست الوزرا اداري معاونیت مقام ته معلومات ورکړي دي.
دوی زیاته کړې، چې په دې ولسوالیو کې امنیت په بشپړ ډول تامین دی او سیمهییز مسولین خلکو ته د خدمت او د دوی د ستونزو حل په برخو کې هڅې کوي.
یادو مسولینو او علمایکرامو ټولو برخو کې د اسلامي امارت پاملرنې ته په اشارې، په بېلابېلو برخو ځانګړي ډول د دې ولایت د وروستیو سېلابونو له امله زیانمنو شویو سیمو کې د دیني مدرسو او ښوونځیو پیاوړتیا، د اوبو بندونو جوړولو، سړکونو د ترمیم او انکشافي پروژو تطبیق ته د ځانګړې پاملرنې غوښتنه کړې ده.
د ریاست الوزرا اداري مرستیال ویلي، چې د سراسري امنیت تامین، اجتماعي هوساینې ایجاد او د خلکو د ستونزو حلول د اسلامي امارت مسولیت دی او په دې برخه کې هیڅ راز هڅې نه درېغوي.
ښاغلي مولوي عبدالسلام حنفي زیاته کړې، چې اسلامي امارت به خپلو امکاناتو ته په پام ستاسو وړاندیزونو ته رسیدنه وکړي.