د افغانستان اسلامي امارت د ریاست الوزرا سیاسي مرستیال مولوي عبدالکبیر د اختر په مناسبت د خپلو لیدنو په لړ کې د امارت له یوشمېر مسولینو، علماوو، مجاهدینو او قومي مشرانو سره لیدنه وکړه.
یادو قومي مشرانو او علماوو د نېکمرغه کوچني اختر په ورځو کې د امنیت په تامین خوښي ښودلې او د اړونده مسولینو قدرداني یې کړې ده.
دوی ویلي، چې ولسونه د مجاهدینو او امنیتي مسولینو له نیک چلند څخه خوښ او له اسلامي امارت سره هر راز همکارۍ ته چمتو دي.
د ریاست الوزرا سیاسي مرستیال مولوي عبدالکبیر له راغلو مېلمنو څخه په مننې ویلي، چې هر افغان په ډاډمنه فضا کې د ژوند کولو او خوښي نمانځلو حق لري او اسلامي امارت یې د دې حق ادا کول خپل مسولیت بولي.
نوموړي زیاته کړې، چې د امنیتي ځواکونو د ښې همغږۍ او د ملت په همکارۍ به تر اختر وروسته هم د امنیت د تامین هڅې جریان ولري.