اسرائیلي چارواکي وايي، چې ایران به په مناسب وخت کې د خپلو بریدونو بیه پرې کړي. خو د ایران پوځي او سیاسي مشرانو ګواښ کړی، چې که اسرائیل بیا برید پرې وکړي، د دوی له لوري به لا سخت، ځواکمن او توند ځواب ورکړل شي.
ایران پرون شپه پر صهیونیستي رژیم شاوخوا ۲۰۰ ډرون، کروز او بالستیک توغندي توغولي وو، چې اسرائیلو یې د لوی شمېر له منځه وړلو ادعا کړه وه.
د ایران دولتي خبري اژانس ایرنا بیا ځینې داسې وېډیوګانې خپرې کړې، چې ادعا کوي په بیت المقدس کې ځینې هدفونه وېشتل شوي دي.
د ایران ولسمشر ابراهیم رییسي یاد بریدونه د ایران پر کونسلګرۍ برید ته مشروع دفاعي غبرګون بللی دی.
د سپاه پاسداران مشر حسین سلامي بیا ګواښ کړی، چې که اسرائیل بیا هر ځای برید پرې وکړي، دوی به یې نیغ په نېغه د ایران له خاورې په نښه کړي.
په مقابل کې اسرائیلي چارواکو ویلي، چې ایران به په مناسب وخت کې د دې برید بیه پرې کړي.
د امریکا ولسمشر جوبایډن بیا پر صهیونیسي رژیم د ایران له ځوابي بریدونو وروسته د اسرائیلو له لومړی وزیر بنیامین نتانیاهو سره په تیلفوني خبرو کې ویلي، چې امریکا به د ایران خلاف په هېڅ ډول بریدونو کې برخه وانهخلي.
ورتهمهال د امریکا د دفاع وزیر لوید اسټین هم ویلي، چې واشنګټن له ایران سره د شخړې په لټه کې نه دی.
له دې وړاندې امریکا د صهیونیسي رژیم په مرکزونو د ایران د بریدونو پر وړاندې له اسرائیلو خپل ملاتړ اعلان کړی و.