د سرحدونو، قومونو او قبايلو چارو وزير ملا نورالله نوري د قطر سفارت له سلاکار دوکتور مردف القاشوطي سره په خپل کاري دفتر کې لیدنه کړې.
په دې لیدنه کې ملا نورالله نوري په کابل کې د قطر هېواد د سفارت سلاکار او مل پلاوي ته د ښه راغلاست ترڅنګ ویلي، قطر د یوه مسلمان هېواد په توګه د افغانستان په اقتصادي پیاوړتیا کې مهم رول لري او د دواړو هېوادونو ترمنځ د اړیکو پراختیا ډېره اړینه ده.
نوموړي د خپلو خبرو په دوام د قطر له حکومت څخه قدردانی کړی او زیاته کړې یې ده، موږ له دغه هېواد سره اوږدې تاريخي ريښې لرو او په یاد هېواد کې مو د خپلواکۍ لومړی ګام ایښی دی.
د سرحدونو، قومونو او قبايلو چارو وزير ویلي، اسلامي امارت یو مستحکم حکومت دی او خپل ولس ته د اسانتیاوو برابرولو په برخه کې شپه او ورځ کار کوي.
په کابل کې د قطر سفارت سلاکار القاشطي د یاد وزارت کړنې ګټورې بللي او ویلي یې دي، افغانستان يو اسلامي هېواد دی او افغانان زمونږ وروڼه دي.
نوموړي زیاته کړې؛ موږ به خپل وروڼه هيڅکله هم يواځې پرې نه ږدو، دا چې دا هېواد تعليم، بيارغونې او پرمختګ ته اړتيا لري، موږ به په دغو برخو کې له تاسو سره اوږه په اوږه ولاړ یو.