د کرنې، اوبولګولو او مالدارۍ وزیر مولوي عطاء الله عمري د تازه مېوو له یو شمېر سوداګرو او صادرونکو سره لیدنه کړې.
په دې لیدنه کې د حاصلاتو د فصل پر مهال یې د صادراتو پر وړاندې پر شته ننګونو خبرې کړي.
مولوي عطاء الله عمري ویلي؛ موږ د سوداګرو او خصوصي سکتور ملاتړ کوو او هڅه کوو، چې له ګاونډیو هېوادونو په ځانګړې توګه له پاکستان سره خبرې وکړو ترڅو د حاصلاتو په موسم کې تازه مېوو ته د خرڅلاو بازار پیدا کړو.
په ورته وخت کې د تازه مېوې یو شمېر سوداګر او صادرونکي چې د ګاونډیو هېوادونو په ځانګړي ډول د پاکستان له پالیسۍ او دوه ګونې چلند څخه شکایت لري، ویلي؛ د حاصلاتو په موسم کې د پاکستان پالیسي بدلېږي او په بېلا بېلو پلمو سوداګریز بندرونه تړي.
دوی له اسلامي امارت څخه غواړي، چې د دوی ستونزو ته رسېدنه وکړي.
د کرنې، اوبولګولو او مالدارۍ وزیر له سوداګرو سره د لیدنې پر مهال د سوداګرو او پانګوالو د ستونزو د حل په برخه کې د همکارۍ ژمنه کړې او ډاډ یې ورکړی، چې د کرنې او مالدارۍ د محصولاتو د سوداګرو لپاره د اسانتیاوو په رامنځته کولو کې به له اړوندو ادارو سره اړینې همکارۍ او هر اړخیزې مرستې کوي، ترڅو د هېواد کرنیز او مالدارۍ محصولاتو ته بازار موندنه وشي.