د اسيايي المپيک په سياليو کې ګډونکوونکي ورزشکاران له درې مډالونو سره نن سهار په پوره وياړ او ډک لاسونه هېواد ته راستانه شول او د سپورت عمومي رياست د مشرتابه، ورزشکارانو او د ورزش مينه والو له لوري يې تود هرکلى وشو.
په همدې مناسبت جوړ شويو مراسمو کې د بدني روزنې او سپورت عمومي ریاست فني او مسلکي مرستیال حافظ احمد جان ځدراڼ، د تکواندو، ووشو او جودو فدراسیون مسوولینو، ورزشکارانو او د دغو درېیو ورزشي رشتو سلګونو مینه والو برخه اخیستې وه او د ګولو د ګېډیو په ورکولو سره یې د راغلو لوبغاړو ستاینه وکړه.
دا پروګرام چې د چين په کوربه توب د اسيايي المپيک په سياليو کې د هېواد د مډال ګټونکو لوبغاړو د تشويق او ستاينې په موخه جوړه شوی و، د المپيک ملي کمېټې او سپورت عمومي رييس مولوي احمدالله وثيق، د دغه رياست فني او مسلکي مرستيال حافظ احمد جان ځدراڼ د رياست سلاکار حيات الله رحماني ، ګڼ شمېر ورزشکارانو او مينه والو هم ګډون کړی و.
په دغه تشويقي پروګرام کې مولوي احمدالله وثيق دوی، د دوی کورنیو، اړونده فدراسيون او ټول ملت ته د دې لاسته راوړنې او مډال مبارکي ویلې او دا یې د سپورت په برخه کې لویه لاسته راوړنه بللې ده.
نوموړي ویلي؛ موږ د ډېرو مډال ګټونکو لوبغاړو د ستاینې شاهدان یو، چې هېواد ته یې ستر ویاړونه راوړي دي.
دغهراز د ورزش رياست به له ورزشکارانو څخه په هره برخه کې هېڅ راز ملاتړ او مرسته درېغ نه کړي.
ښاغلي وثیق زیاته کړې؛ دا د خوښۍ خبره ده چې د سپورت په تاريخ کې د لومړي ځل لپاره په دې سياليو کې ګڼ شمېر افغان ورزشکارانو ګډون کړی او هېواد ته یې ویاړ ور وباښه، په داسې سترو ورزشي سياليو کې ګډون کول اسانه کار نه دی، د افغانستان د ورزش په تاريخ کې زموږ ورزشکارانو په خپل هوډ او قوي ارادې سره په دې سياليو کې برخه اخیستې او خپل ګران هېواد ته وياړونه راوړي دي.
دغه راز داسې هېوادونه شته چې زموږ په پرتله زياتې اسانتياوې او امکانات لري او ډېر لوبغاړي یې په ورته برنامو کې برخه اخلي، خو هېڅ مډال یې نه دی ګټلی.
زموږ د هېواد ورزشکاران لږې اسانتیاوې او امکانات لري او ډک لاس هېواد ته راستنیږي، دا ډېر د ویاړ او خوښۍ ځای دی.
ښاغلي وثیق ویلي، چې د اسلامي امارت له راتګ سره ورزشي ډګر د ودې او پرمختګ په حالت کې دی، سپورت نه یوازې په مرکز بلکې د هېواد په کلیو او لرې پرتو سیمو کې هم په عادي ډول روان دی.
په پای کې یې ژمنه کړې، چې د ټولو ورزشي ډګرونو ورزشکارانو ته به د امکان تر حده ښه ورزشي زمینه برابره کړي او هڅه کوي چې د دغو ورزشکارانو لپاره د معنوي ملاتړ ترڅنګ مالي ملاتړ هم پیدا کړي، تر څو ورزشکاران له کومې ستونزې پرته خپل ورزش او ژوند ته دوام ورکړي.
په غونډه کې د بدني روزنې او ورزش د عمومي رياست فني او مسلکي مرستيال حافظ احمد جان ځدراڼ ویلي، چې په دې مهمو او اساسي سياليو کې زموږ د ورزشکارانو په ګډون او د مډالونو په ګټلو سره موږ ټولو ته خوښي راکړې.
دغه مډالونه یوازې د ورزشکارانو او د سپورت ریاست لپاره نه دي، بلکې د هیواد په ټولو توکمونو او د هیواد په ټولو خلکو پورې اړه لري.
د هېواد د تکواندو فدراسیون رییس ډاکټر نجیب الله سکندر ویلي، چې دا پروګرام د ورزشکارانو د روحیې لوړولو لپاره خورا ګټور او ارزښتناک دی، ځکه چې ورزشکاران د ځان او نورو په اړه فکر کوي او وایي چې د ورزش ریاست د ورزش په ټولو برخو کې د ورزشکارانو ملاتړ او ستاینه کوي.
ښاغلي سکندر زیاته کړې؛ مسولین باید نه یوازې د ورزشکارانو معنوي ملاتړ ته، بلکې د ورزشکارانو مالي ملاتړ ته هم پام وکړي، ځکه چې ورزشکاران یوه غریبه طبقه ده او په جدي توګه مالي ملاتړ ته اړتیا لري.
همدا ورزشکاران دي چې د هېواد لپاره وياړونه ګټي او په بهرنيو ورزشي ډګرونو کې د افغانستان استازيتوب کوي.
د پروګرام په پای کې د اسیایي المپیک سیالیو د ووشو مډال ګټونکي محمد خالد هوتک د ورزشکارانو په استازیتوب خبرې کړې او دې سیالیو ته د چمتووالي او څرنګوالي په اړه یې معلومات ورکړي او د ورزش له ریاست څخه یې د مالي او معنوي مرستو غوښتنه کړې ده.
د اسيايي المپيک سيالۍ د چين په هانګ ژو ښار کې د ۴۵ اسيايي هېوادونو د ۴۰ ورزشي رشتو د ١٢ زره ۵۰۰ ورزشکارانو په ګډون روانې دي، چې له افغانستان څخه د ۱۵ ورزشي رشتو ٨٠ تنو ورزشکارانو ګډون کړی، چې په تکواندو کې د محسن رضايي او په ووشو کې د محمد خالد هوتک اومحمد نصرت حبیبي له لوري د برونزو مډالونه ترلاسه کړل.
