د چارو ادارې لوی رییس شيخ نورالحق انور د شهداوو او معلولينو چارو وزارت او افغانستان برېښنا شرکت د اداري پروسو ساده کولو هوکړه لیک د لاسليک په مراسمو کې ویلي، چې د اسلامي امارت مسولين د ولس له منځه راپورته شوي، له درده يې خبر او ستونزو ته د رسېدنې په برخه کې جدي هڅې کوي.
ښاغلي انور ویلي، چې د اداري پروسو د پېچلتيا له امله د خلکو حقوق تلف کيږي خو دا د اسلامي امارت وجيبه ده چې د خلکو د حقوقو څخه ساتنه وکړي.
دغه راز په دې غونډه کې د اداري اصلاحاتو او ملکي خدمتونو ریيس مولوي عبدالحنان عارف الله ویلي؛ هغه ستونزې چې په امارتي ادارو کې خلک ورسره مخ کيږي د دې ادارې په هڅو به له منځه وړل یو وړل شي او هېوادولو ته به هر ډول کې اسانتیاوې امنځته کوي.
د یادې ادارې رییس ویلي، چې په تېر يو کال کې د بېلابېلو امارتي وزارتونو او ادارو ۳۶۶ پروسې ساده شوي او دا بهير به لا دوام وکړي.
په غونډه کې د شهداوو او معلولينو چارو وزارت او افغانستان برښنا شرکت مسؤلينو د اداري پروسو ساده کولو له امله د اداري اصلاحاتو او ملکي خدمتونو رياست څخه مننه وکړه او دا چاره يې خلکو ته د اسانتياوو په رامنځته کولو کې مهمه بللې.

روزګان د عامې روغتیا ریاست کې د پولیو ۳ ورځني واکسین کمپاین پیل شوی، چي پر مهال به یي ۲۲۰ زره ماشومانو ته واکسین وشي.

واکسین د بیړنۍ خونې مسول ډاکټر بخت محمد مصطفی ویلي، چې د مرکز ترینکوټ ترڅنګ د روزګان په ټولو ولسوالیو کې ۲۳۷ زره ماشومان سته چي له جملې به یې ۲۲۰ زره ماشومانو ته یاد واکسین وشي.

د نوموړي په وینا؛ دا مهال روزګان کې د پولیو واکسین د تطبیق پروسه سایټ پر سایټ ده او په هرو شپږو میاشتو کې ویټامین اې ورکول کیږي.

ډاکټر بخت محمد مصطفی زیاته کړې، د تېر په څېر مو دا وخت د عامه پوهاوي پر مټ د ماشومانو د واکسینول ۲۵ سلنه زیات شوي او خلک خپلو ماشومانو ته د پولیو واکسین کوي.

د روزګان ولایت د اطلاعات او کلتور رییس قاري اغاولي قریشي پر ټولو والدینو غږ کړی، چې خپل ماشومانو ته د ګوزڼ ضد واکسین وکړي او د همیشني پلج څخه یې وژغوري.

ښاغلي مصطفی ویلي، یاد واکسین سره به ټول ماشومان سالمه روغتیا ولري او په راتلونکي کې به روغتیايي ستونزې ونلري.

واکسین د بیړنۍ خونې مسول د ملا امامانو او مخورو غوښتنه کړې، چې د یاد واکسین د پلي کیدو پر مهال د خپل عامه پوهاوی پر مټ خلک خپلو ماشومان د پولیو واکسین کولو ته وهڅوي.

تر دې وړاندي په هرو ۱۰۰ ماشومانو کې ۷۰ ماشومانو ته د پولیو واکسین ورکول کیدل خو د عامه پوهاوي د کچې زیاتوالی له امله دا مهال هر ۱۰۰ ماشومانو کې ۹۰ تنه د یاد واکسین څخه برخمن شوي دي.

د کندوز سپین زر دولتي شرکت له لوري اروپایي هېوادونو ته د وچو رومیانو ۱۵۰ ټنه لومړۍ محموله صادر شوې.

 په دې اړه په جوړو سوو مراسمو کي د دولتي شرکتونو عمومي رییس مولوي عبدالحميد اخوند زاده، د سپین زر دولتي شرکت رییس عبدالحفیظ فریاد او نورو لوړ پوړو مسولینو ګډون کړی وو.

د دولتي شرکتونو عمومي رییس ویلي؛ دا د اسلامي امارت لپاره یوه ستره لاسته راوړنه ده، چې د هېواد سبزیجات او ترکاري اروپایي هېوادونو ته استوي.

مولوي عبدالحميد اخوند زاده زیاته کړې؛ اسلامي امارت به دغه زار د واخان له لارې هېواد له اروپا او اسیا سره ونښلوي، چې په دې سره به هره ورځ د پرمختګونو شاهدان یو.

د یاد شرکت مسولینو دغه صادرات د هېواد د پرمختګ او ځان بسیاینې لپاره مهم ګام بللی او د ورته نورو تولیداتو ډاډ یې څرګند کړی.

سپین زر دولتي شرکت له تېرو ۲۱ کلونو راهیسي غیر فعال وو، چې د اسلامي امارت په راتګ سره یې بیا په فعالیت پیل کړی او اوس مهال پکې پنبه، د پنبې غوړي، کونجاړه او کاغذي دستمالونه جوړ او پروسس کېږي.

د روسیې پخواني ولسمشر او د دې هېواد د ملي امنیت شورا اوسنی مرستیال دیمیتري مدودف له اوکراین څخه د څلورو نیول شویو سیمو د نیولو کالیزې په مناسب جوړه شوې غونډه کې څرګنده کړې، چې مسکو ښايي د اوکراین نورې سیمې هم د روسیې د خاورې سره یوځای کړي.

مدودف دا څرګندونې پداسې حال کې کړي، چې کرملین یو کال وړاندې د اوکراین د څلورو سیمو د خپلیدو خبر ورکړی وو.

د روسیې ولسمشر ویلادیمیر پوتین په اوکراین کې د څلورو سیمو خارسون، زپروژیا، دونتسک او لوګانسک د نیولو او د روسیې له فدراسیون سره د یوځای کېدو د لومړۍ کالیزې له امله د روسیې خلکو ته مبارکي ورکړې او ټینګار یې کړی، چې د هېواد د نورو سیمو د اوسېدونکو په شان به د دغو سیمو اوسېدونکو ته هم د پام وړ خدمات وړاندې کړي.

روسیې د امنیت شورا مرستیال ویلي، ځانګړي پوځي عملیات به په کیف کې د نازي رژیم تر بشپړ له منځه وړلو پورې دوام وکړي.
نوموړي زیاته کړې، بريا به زموږ وي او په روسيه کې به نورې نوې سيمې هم رامنځته شي.
روسیه د “نویو سیمو” اصطلاح د اوکراین د دونیتسک، لوهانسک، ژاپوریژیا او خرسون سیمو ته کاروي، چې مسکو یې د سپتمبر په میاشت کې د خپلې خاورې سره د یوځای کیدو ادعا کړې وه.
روسیه په داسې حال کې د اوکراین پر وړاندې روانه جګړه کې ځان بریالی ښيي، چې تازه د امریکا کانګرس د دغه هېواد د بودیجې په لنډ مهالي تمدید کې اوکراین سره مرستې نه دي شاملې کړي.

د اطلاعاتو او کلتور سرپرست وزير ملا خيرالله خيرخواه په کابل کې د اطلاعاتو او کلتور وزارت د ځوانانو چارو معینیت لخوا د آنلاين سوداګرۍ (فريلانسينګ) تخصصي مرکز د پرانيستغونډې پر مهال ویلي، د ټولنې ځوان قشر باید د هېواد په ابادۍ او ښیرازۍ کې فعاله ونډه واخلي.

ملا خيرالله خيرخواه زیاته کړې؛ ځوانان د ټولنې نه ستړي کېدونکی قشر دی، دوی بايد تل د هېواد د ابادۍ او جوړولو فکر وکړي او د هېواد د ابادۍ لپاره نه ستړي کېدونکې هڅې وکړي.

سرپرست وزیر ویلي؛ اسلامي امارت ژمن دی چې د ځوانانو لپاره د کار زمینه برابره کړي، تاسو هم هڅه وکړئ چې له دې فرصت څخه اعظمي استفاده وکړئ.

د نوموړي په وینا، ځوانانو اشغال مات کړی، هېواد ته یې ازادي ګټلې، اوس بايد په تعليمي ډګر کې همغه ډول کوښښ وکړي، ترڅو په دغه ډګر ‌کې هم بریاوې ولرو.

د ايران او ايټاليا هېوادونو د سیلانیانو تر څنګه د چين څخه هم د سیلانيانو يوې نهه کسيزې ډلې کندهار ولایت ته سفر کړی، نوموړو د یاد ولایت د اطلاعاتو او کلتور رییس مولوي انعام الله سمنګاني سره د ليدنې پر مهال افغانستان ته په راتګ خوښي ښودلې او هلته یې د تاریخي سیمو، تاریخي ابدو او نورو تفریحي سیمو څخه لیدنه کړې.
مولوي انعام الله سمنګاني دوی ته د ښه راغلاست تر څنګ د بشپړ امنیت ډاډ ورکړی او د هېواد د نورو تاریخي او لرغونو سیمو ترڅنګ یې د کندهار پر تاریخي، سیاحتي او لرغونو سيمو هر اړخيزې خبرې کړي.
په دې وروستيو کې کندهار ته د بهرنیو سیلانیانو د راتګ شمېر زیات شوی، هره ورځ لسګونه سیلانيان راځي او د کندهار د بېلا بېلو سياحتي سيمو څخه ليدنه کوي.

د ۲۱۷ عمري قول اردو د رهبرۍ په لارښوونه بغلان ولایت کې د خاواک او اندراب کوتل مواصلاتي لار د یادې قول اردو د دریمۍ انجینرۍ لوا له لوري د جوړولو چارې روانې دي.

خاواک کوتل لارې د مسافرو لپاره یو شمېر ستونزې جوړې کړې وې؛ چې د ۲۱۷ عمري قول اردو په لارښوونه یاد کوتل د انجینرۍ ټیم له لوري رغول کیږي.

تر اوسه پورې د یاد کوتل ۱۲ کیلومتره سړک تکمیل شوی او ۳۰ کیلو متره سړک نور هم ترمیم ته اړتیا لري، چې د یاد ټیم له لوري به یې کارونه ژر تر ژره پای ومومي.

په داسې حال کې چې د سالنګ تونل د جوړولو چارې شروع شوي دي، بدیله لار یې د خاواک کوتل او شیبر ټاکل شوې.

د مالیې وزارت مالي مرستیال او کفیل عبدالقدیر احمد په افغانستان کي د خوړو نړیوال پروگرام (WFP)  له مشرې مېرمن شاو وې لي سره لیدنه کړې.
مالي مرستیال د WFP مسولینو څخه په افغانستان کې د فعالیتونو جاري ساتلو له امله مننه کړې او د هر اړخیزې همکارۍ ډاډ یې ورکړی.

نوموړي ویلي، مالیې وزارت به په بشري او پراختیایي برخه کې د WFP فعالیتونو لپاره د لا ډېرو همکاریو او اسانتیاوو رامنځته کولو ته دوام ورکړي.
عبدالقدیر احمد غوښتنه کړې، چې WFP دې د بشري مرستو ترڅنگ په پراختیایي برخو کې هم مرستې وکړي، ترڅو د افغانانو ستونزو ته په دایمي او اساسي توگه رسېدنه شوې وي.
په افغانستان کې د WFP مشرې له مالیې وزارت څخه مننه کړې، چې په تېرو دوو کلونو کې یې د بشري مرستو د رسولو په برخه کې یو لړ مهمې گمرکي او مالیاتي اسانتیاوې برابرې کړي، چې د بشري فعالیتونو د پراختیا په برخه کې یې مثبت اثر کړی دی.

نوموړې زیاته کړې، چې WFP د افغانستان وضعیت له نږدې څاري او د بهرنیو مرستو د راجلبولو په موخه به د افغانستان د وضعیت او د بشري مرستو په برخه کې د رامنځته شوو اسانتیاوو رښتینی انځور نړیوالو ته ورسوي.
په افغانستان کي د خوړو نړیوال پروگرام مشرې ډاډ څرگند کړی، چې دوی به په افغانستان کې د اړوند وزارتونو سره په گډه د بشري مرستو رسولو او پراختیایي مرستو د برابرولو برخه کې خپلو کړنو ته دوام ورکوي.

د بهرنيو چارو سرپرست وزير مولوي امير خان متقي سره د مسکو فارمټ په څنډه کې د چين او پاکستان ځانګړو استازيو هر يوه يو‌شيانګ او اصف دراني ګډه ناسته ترسره کړې.

په دې ناسته کې د افغانستان، پاکستان او چين پر اړيکو، ګډو ګټو او ګواښونو هر اړخیزې خبرې شوي.

د بهرنيو چارو سرپرست وزير پاکستان سره د افغانستان اړيکې دوستانه بللي او ټينګار يې کړی، چې د ستونزو د راپورته کېدو پرمهال بايد د رسنيزو څرګندونو پرځای له ديپلوماتيکو لارو يې د حل هڅه وشي.

د پاکستان استازي هم ټينګار کړی، چې ستونزې د دوو اړخيزو ديپلوماتيکو چينلونو له لارې اوارې شي.

چينايي لوري د افغانستان او پاکستان د دوې اړخيزې ديپلوماسۍ ستاينه کړې، چې پر وخت يې اړوندو مسلو ته حل‌لاری موندلي دي.

چينايي لوري همداراز ډاډ ورکړی؛ چې په سيمه کې د امنیت، ثبات او پرمختګ د ملاتړي هېواد په توګه چمتو دی، چې افغانستان سره په ګڼو برخو کې خپلې مرستې لا زياتې کړي.

د زابل ولایت د سرحدونو او قبايلو چارو رياست مسولين وايي، چې د اسلامي امارت په راتګ سره یې د ولایت په کچه د قومونو او بېلا بېلو کورنيو ترمنځ ۱۸ روغې او جوړې کړې دي.

د یاد ریاست مسولین وايي، چې د يادو روغو جوړو په ترڅ کې داسې مشکل موضوعات هم حل شوي، چې د مړو موضوعات پکې شامل وو.

دغه راز د دې ولايت علماء او قومي مشران له اسلامي امارت خوښ څرګندوي او وايي، چې په راتګ سره يي د خلکو او قومونو تر منځ زيات شمير ستونزې حل شوې دي.

د یادولو وړ ده، چې د اسلامي امارت په واکمنيدو سره د سرحدونو او قبايلو چارو د رياست ترڅنګ د سيمه ييزو مسږلينو او قومي مشرانو په منځګړيتوب لسګونه دښمنۍ او شخړې حل او پر دوستي بدلې شوې دي.