د ټولګټو وزارت ویاند محمد اشرف حقشناس وایي، چې د ۱۴۰۴ لمریز کال د ليندۍ مياشتې له پيله تر پايه د دې وزارت د اوسپنې پټلۍ له لارې ۴۸۴ زره او ۱۰۲ مټریک ټنه انتقالات شوي دي.
نوموړي زیاته کړې، چې د حیرتان بندر له لارې ۴۸۹ زره او ۶۴۲ ټنه، د اقینې بندر له لارې ۵۰ زره او ۷۵۲ ټنه، د تورغونډۍ بندر له لارې ۷۴ زره ۸۷۴ ټنه او د خواف –هرات له لارې ۶۸ زره ۸۳۴ ټنه انتقالات شوي، چې په کې نفتي، غیرې نفتي او نور توکي هېواد ته وارد او صادر شوي دي.
ښاغلي حقشناس په وینا، د انتقالاتو له ډلې یوه برخه صادرات دي، چې په تېره میاشت کې یو زر او ۵۸۱ ټنه د انارو جوس او وچه مېوه له هېواد څخه بهر ته صادره شوي ده.
یادونې وړ ده، هر څومره چې د اوسپنې پټلۍ له لارې د صادراتو او انتقالاتو کچه لوړيږي، په هماغه اندازه کاري فرصتونه برابریږي، ملي عواید زياتيږي او په ټوله کې اقتصادي ثبات، ترقۍ او ځان بسياينې ته لاره هواریږي.
