د بهرنيو چارو وزارت وایي، چې کابل کې د افغانستان، چين او پاکستان د بهرنيو چارو وزيرانو د ډيالوګ شپږمه ناسته وشوه.

په دې ناسته کې د تېرو ناستو پر پرېکړو د بیا کتنې ترڅنګ د درې واړو هېوادونو ترمنځ پر سياسي، اقتصادي او ټرانزیټي برخو کې د اړيکو پر پياوړتيا ټينګار شوی دی.

د بهرنيو چارو وزير مولوي امير خان متقي ویلي، سيمه کې په ګڼو برخو کې د همکاريو د پراختيا لپاره غوره فرصتونه راټوکېدلي او باور لرو چې موږ او تاسې وتوانېږو له دغو فرصتونو څخه د خپلو هېوادونو لپاره ګټه واخلو.

نوموړي زیاته کړې، دغه درې اړخيز ميکانيزم موږ ته د دې فرصت راکوي، چې د همکاريو د لا پراختيا پر لارو چارو عملي او متمرکز بحثونه ولرو.

ښاغلي متقي ویلي، د افغانستان اسلامي امارت له حاکمیت وروسته موږ خپله بهرنۍ پالیسي د اقتصاد په محور اعلان کړې او هڅه مو دا ده، چې افغانستان د امنیتي ننګونو له روایت څخه د اقتصادي نښلون د څلور لارې په روایت بدل کړو‌ او نوي ځمکني واقعیتونه هم زموږ د دغه سياست له برياليتوب سره مرسته کوي.

د بهرنيو چارو وزير زياته کړې، دا چې موږ تېرو څلورو کلونو کې په سوداګرۍ، پانګونې او د سیمه‌ییز اتصال په پروژو کې کوم پرمختګ کړي دي، د همدې نیت او ارادې ملموسه پایله ده.

مولوي امير خان متقي همداراز ټینګار کړی، درې واړه هیوادونه په اقتصادي برخه کې د پام وړ ظرفیتونه لري چې باید په ښه ډول ترې استفاده وشي او اقتصادي موضوعات له نورو مسايلو سره ونه تړل شي.

 دغه راز د چين د بهرنيو چارو وزير افغانستان سره د خپل هېواد اړيکې مخ پر وده بللي او زياته کړې یې ده، چې د دواړو هېوادونو ترمنځ همکارۍ په ګڼو برخو کې پراخې شوې دي.

ښاغلي وانګ‌يي د افغانستان او پاکستان ترمنځ د سفيرانو کچې ته د ديپلوماتيکو استازوليو لوړول ښه پرمختګ بللی دی.

همدا راز د پاکستان د بهرنيو چارو وزير هم د درې واړو هېوادونو د بهرنيو چارو وزيرانو ناسته مهمه بللې او دا یې د یادو هېوادونو ترمنځ د همکاریو د پراختیا ښته فرصت یاد کړی دی.

 ښاغلي اسحاق دار د افغانستان او پاکستان ترمنځ د همکاريو زياتوالی ستایلی او هيله يې څرګنده کړې، چې درې واړه هېوادونه لا زيات پرمختګونه ولري.

همدارنګه په پای کې ګډونوالو د ورته ناستو پر دوام او د اړيکو پراختيا ټينګار کړی.

د کډوالو او بېرته راستنېدونکو چارو وزیر مولوي عبدالکبیر د کويټ هېواد د پارلمان له پخواني غړي دوکتور دجیح خلف الشري، د خیره بنسټ له غړي جارالله او سوداګر الشیخ فهد الهنان سره لیدنه کړې.

په دې لیدنه کې مولوي عبدالکبیر ویلي، چې له اسلامي هېوادونو سره مثبتې اړیکې اسلامي امارت ته لومړیتوب لري.

 نوموړي زیاته کړې، اسلامي امارت په افغانستان کې د مسول نظام په توګه د هېواد د پرمختګ لپاره کار پيل کړي او هڅه کوي چې په سیمه کې د یوه اغېزمن نظام په توګه خپلو اقتصادي چارو ته دوام ورکړي.

دغه راز دوکتور دجیح خلف الشري ویلي، چې افغانستان ته یې د سفر موخه له اسلامي نړۍ او کویټ هېواد سره د اسلامي امارت د اړیکو پياوړتیا ده.

نوموړي زیاته کړې، د اسلامي هېوادونو ترمنځ نږدې او مثبتې اړیکې د وخت اړتیا ده او باید پياوړتیا ته یې کار وشي.

ښاغلي الشري په افغانستان کې د اسلامي امارت له بریا وروسته د افغان ولس لاسته راوړنې ستایلي او یادونه یې کړې، چې افغانان د پرمختګ او اقتصادي ودې له لپاره ګڼ فرصتونه لري.

نوموړي څرګنده کړې، چې له اسلامي نړۍ سره د اسلامي امارت د مثبتو او رغنده اړیکو لپاره به خپلو هڅو ته دوام ورکړي.

په متحده عربي اماراتو کې د اسلامي امارت سفير مولوي بدرالدین حقاني د متحده عربي امارتو لپاره د روسیې له سفیر تیمور زابیروف سره لیدنه کړې.

په ابوظبۍ کې د افغانستان سفارت وایي، چې په دې لیدنه دواړو لوریو د افغانستان او روسیې د سياسي، اقتصادي او سيمه‌ييزو اړیکو پر پياوړتيا، د افغانستان پر ثبات او هوساينې او د متقابل درناوي له مخې د همکاریو پر پراختيا خبرې کړي.

د یاد سفارت په وینا، د روسيې سفير د افغانستان د امنيت او پرمختګ د ستاینې ترڅنګ د همکاریو د پراختیا هوډ څرګند کړی.

ورته مهال د افغانستان سفير د روسيې له مثبت دريځ څخه مننه کړې او ډاډ يې ورکړی، چې اسلامي امارت به د سيمې د ثبات او ګډو همکاریو لپاره خپلې هڅې دوامداره وساتي.

د کورنیو چارو وزیر خلیفه سراج‌الدین حقاني د چین د بهرنیو چارو له وزیر وانګ‌يي او مل پلاوي سره لیدنه کړې.

په دې لیدنه کې د امنیت، د نشه‌يي توکو پر ضد مبارزې، د سرحدي ځواکونو د همغږۍ، د ګډو پولو د امنیت، د سوداګرۍ، کرنې او روزنیزو پروګرامونو په اړه خبرې شوې دي.

خلیفه سراج‌الدین حقاني د دواړو هېوادونو اړیکې تاریخي بللې او چین یې داسې ګاونډی یاد کړی، چې تل یې له افغانستان سره نېک تعامل ساتلی دی.

همدارنګه چین د بهرنیو چارو وزیر ښاغلي وانګ‌‌يي ویلي، زموږ او د افغانستان اړیکې په تاریخ کې ژورې رېښې لري.

د ریاست‌الوزرا د اقتصادي مرستیال ملا عبدالغني برادر اخوند په حضور کې نن د روان ۱۴۰۴ لمریز کال د زمري میاشتې پر ۲۹مه په مرمرینه ماڼۍ کې د مالیې وزارت او د افغانستان بانک تر منځ د سوداګریزو بانکونو له لوري د ټولګټو پروژو د تمویل میکانیزم لاسلیک شو.

دغه سند د اقتصادي کمېسیون د کاري طرزالعمل د دویمې مادې د پینځمې فقرې پر اساس جوړ شوی، تر څو په قانوني ډول د سوداګریزو بانکونو د ونډې اخیستو له لارې د ټولګټو پروژو تمویل ته زمینه برابره شي.

د دې سند موخې په ټولګټو پروژو کې د ونډې اخیستو او د دې پروژو د تمویل لپاره د اسانتیاوو رامنځته کول، د هېواد په دننه کې د سوداګریزو بانکونو لپاره د پانګونې فرصتونو برابرول او د سوداګریزو بانکونو د عوایدو د زیاتوالي لپاره د زمینې برابرول دي.

د یاد میکانیزم له مخې به مالیه وزارت له اړوند سکټوري ادارو څخه ټولګټې پروژې غواړي او دغه وزارت به یې مالي موډلونه ترتیبوي. د افغانستان بانک به د ټولګټو پروژو په تمویل او تطبیق کې سوداګریز بانکونه ونډې اخیستو ته هڅوي.