د کرنې، اوبولګولو او مالدارۍ وزارت وايي؛ دې وزارت کې د یو پروګرام په ترڅ کې د مشارکت (ګډون) او مضاربت په نوم د کرنیزې پرمختیا صندوق دوه اسلامي خدماتي محصولات د کرنې وزارت د مشرتابه، د ملي پراختیایي شرکت، د کرنې او مالدارۍ خونې او د افغانستان اسلامي امارت د نورو مالي بنسټونو د استازو په شتون کې پرانیستل شول.

په دې پروګرام کې د کرنې وزارت د کرنې او مالدارۍ مرستیال مولوي صدراعظم عثماني په اغېزمن او شفاف دول د پروژو د پلي کولو د هڅو په اړه خبرې کړي او ویلي يي دي؛ زموږ مسوولیت دا دی، چې د هېواد کروندګرو او مالدارانو لپاره شپه او ورځ کار وکړو.

نوموړي زیاته کړې؛ د اسلامي مالي خدمتونو رامنځته کول هم یو له هغو خدمتونو څخه دی، چې د کرنې وزارت له خوا کروندګرو، مالدارانو او خصوصي سکتور ته وړاندې کېږي.

د کرنې او مالدارۍ مرستیال ویلي؛ د اسلامي امارت له فتحې وروسته موږ د اسلامي مالي خدمتونو د وړاندې کولو بهیر پیل کړ، چې له دې لارې موږ د خصوصي سکتور سوداګرو او متشبثینو ته ۱.۳ میلیارده افغانۍ ورکړي دي.

ښاغلي عثماني زیاته کړې؛ د دوو نویو محصولاتو په وړاندې کولو سره، موږ غواړو چې د کال تر پایه د وزارت د کرنیزې پرمختیا صندوق له لارې په هېواد کې د کرنې د ودې او پراختیا لپاره د دوه ملیارد افغانیو په ارزښت اسلامي مالي خدمات وړاندې کړو.

په ورته وخت کې د کرنیزې پرمختیا صندوق د اجراییوي بورډ رییس انجنیر عبدالغفور غفاري د دغه ادارې د نویو محصولاتو په اړه معلومات ورکړي او د اسلامي امارات او خصوصي سکتور ترمنځ د همکاریو پر زیاتوالي یې ټینګار کړی.

نوموړي ویلي؛ دغه دوه نوي محصولات چې د کرنیزې پرمختیا صندوق د عالي شورا لخوا منظور شوي دي، په کې مضاربت یا د پانګونې د تمویل مفکوره او مشارکت (ګډون) د پانګې شریکول شامل دي، چې له دې لارې موږ غواړو د هېواد د کرنې او مالدارۍ ځنځیري ارزښت ته په پام سره د بزګرانو، مالدارانو او خصوصي سکټور د متشبثینو د کوچني سوداګرۍ او کاروبار ملاتړ او ورته وده ورکړو.

په ورته وخت کې په دغه پروګرام کې د ملي پراختیا شرکت مالي او اداري مرستیال مولوي عبدالولي عادل هم په هېواد کې د لا زیاتو پرمختیايي پروژو د پلي کېدو په اړه خبرې کړي او په هېواد کې یې د زېربنایي پروژو د پلي کېدو په برخه کې د اسلامي امارت د هڅو یادونه کړې.

د کرنیزې پرمختیا صندوق د مسولینو په وینا، بزګران، مالداران، سوداګر او د خصوصي سکتور متشبثین کولی شي له دغو اسلامي تمویلي محصولاتو (ګډون او مضاربت) څخه په استفادې خپل کاروبار پراخ کړي.

د عامې روغتیا وزیر مولوي نور جلال جلالي د روغتیا نړیوال سازمان له حوزوي مشرې حنان البلخي، د افغانستان لپاره د روغتیا نړیوال سازمان له مشر ایډوین سینیزا سلاوډر او د ختیځې مدیترانې حوزې د پولیو له منځه وړلو له مسول ډاکټر حامد جعفري سره انلاین غونډه کړې.
په دې غونډه کې د عامې روغتیا وزیر د روغتیايي خدماتو د پراختیا، د روغتیایي پرسونل ارتقا ظرفیت، په لرې پرتو سپینو سیمو کې د روغتیایي خدماتو برابرولو او د ساري ناروغیو د مخنیوي، د بېړنیو او لنډ مهالو مرستو ترڅنګ د پراختیايي او پایښت لرونکو مرستو پر اړتیا او څرنګوالي خبر کړې دي.
بل لور ته د روغتیا نړیوال سازمان د ختیځې مدیترانې مشرې حنان البلخي د افغانستان د روغتیايي سېستم سره د نړیوالو مرستو د را جلبولو تر څنګ پر دوامدارو او بنیادي کړنو ټینګار کړی دی.
د نوموړې ویلي، د افغانستان د روغتیايي سیستم د لا ښه والي په موخه باید لا زیات کار وشي او په دې برخه کې یې د هر ډول همکارۍ ډاډ ورکړی.

د ریاست الوزرا د دفتر عمومي رییس ډاکټر ملا عبدالواسع د ننګرهار ولایت د ډاکټرانو اتحادیې رییس ډاکټر واقف نیازي او مل  پلاوي سره په ارګ لیدنه کړې.

په دې لیدنه کې ډاکټر واقف نیازي په ننګرهار ولایت کې خلکو ته د روغتیایي خدمتونو وړاندې کولو لپاره د یادې اتحادیې کړنې او فعالیتونه تشریح کړي او ويلي یې دي؛ په ننګرهار، ولسوالیو او تورخم کې یې بېوزلو او د طبیعي پېښو ناروغانو او ټپیانو ته د روغتیایي کمپونو له لارې خدمات وړاندې کړي او دغه پروسه لا جریان لري.

دغه‌راز د ننګرهار ولایت د ډاکټرانو اتحادیې رییس او غړو د ننګرهار د زر بستریز روغتون د پاتې چارو بشپړولو، د سرطاني ناروغیو د تشخیص او درملنې لپاره د پاملرنې زیاتوالي، پر ډاکټرانو د مالیاتو کموالي او د ډاکټرانو د ظرفیت لوړولو لپاره د حکومت له لوري د ځانګړو کورسونو جوړولو لپاره خپل وړاندیزونه او غوښتنې مطرح کړي دي.

د ریاست الوزرا عالي مقام د دفتر عمومي رییس ویلي، ډاکټران هېوادوالو ته پر وخت او په ښه ډول د روغتیایي خدمتونو وړاندې کولو دروند مسولیت لري او اسلامي امارت د دوی د خدمتونو ستاینه کوي.

ډاکټر ملا عبدالواسع زیاته کړې، اسلامي امارت په هېواد کې د بېلا بېلو اصنافو د کړنو ستاینه او ملاتړ کوي او د مالیاتو معافولو او کمولو په هکله د عالیقدر امیرالمؤمنین حفظه الله تعالی وروستی فرمان هغوی ته د لازمو اسانتیاوو برابرولو ښه څرګندونه کوي.

د کرنې، اوبولګولو او مالدارۍ وزارت وايي؛ د دې وزارت مالي او اداري مرستیال ملا اغاجان اخوند د کندوز ته د سفر په ترڅ کې د دې ولایت له یو شمېر بزګرانو سره لیدنه کړې.

په دې لیدنه کې د بزګرانو پر ستونزو او د خلکو د اقتصادي ودې په اړه خبرې شوې دي.

ملا اغاجان اخوند په دې لیدنه کې ویلي؛ د کندوز خلکو د جهاد پر مهال ډېر زیانونه ګاللي، اوس د دې ولایت د جوړېدو وخت دی، موږ ټول باید پرته له توپیره د هېواد په ودانولو کې ونډه واخلو، د بزګرانو د اضافي غنمو پېرل او زېرمه کول داسې یوه پروسه ده، چې د بزګرانو په ګټه ده.

د کندوز ولایت د کرنې رییس مولوي امان الله حسن ویلي؛ کندوز د افغانستان یو له حاصلخیزو ولایتونو او د افغانستان کندو دی، د دغه ولایت ډېری کرنیز محصولات نورو ولایتونو ته صادرېږي.

دغه راز د کرنې وزارت د ستراتیژیکو زېرمو رییس مولوي قدرت الله حقیار د اضافي غنمو د راټولولو پروسه بیان کړې او ویلي يي دي؛ کندوز کې له کروندګرو څخه له شپږ زره متریک ټنه څخه زیات اضافي غنم اخیستل کیږي او زېرمه کیږي او په بیړنیو، بحراني حالاتو او د غنمو د بیې د لوړېدو په وخت کې ترې کار اخیستل کېږي.

د دغه ولایت کروندګرد کرنې لپاره د کافي اوبو له نشتوالي، د سرې او کرنې د لګښتونو لوړوالی، د ښه بازار له نشتوالي، د کرنیزو وسایلو له نشتوالي او د اصلاح شویو تخمونو پر وخت د نه وېش له امله شکایت کړې او له اسلامي امارت څخه یې غوښتي، چې خلکو سره مرستې او همکاري وکړي.

د ریاست الوزرا سیاسي مرستیال مولوي عبدالکبیر د کابل د تېرې ادارې او پخوانیو یو شمېر چارواکو، قومي مشرانو، پوهانو، او د بېلا بېلو ولایتونو له عالمانو او ځوانانو سره لیدنه کړې.

په دې لیدنه کې په تېره اداره کې د حج او اوقافو وزیر محمد صدیق چکري، د اوبو او برېښنا وزیر سید محمد ایوب او د کورنیو چارو وزیر منشي عبدالمجید د نورو په استازولۍ خبرې کړې او ویلي یې دي، په افغانستان کې د اسلامي نظام حاکمیت د افغانانو هیله وه او دوی د دې نظام د پایښت او پياوړتیا لپاره هر راز همکارۍ ته چمتو دي.

نوموړو زیاته کړې؛ په افغانستان کې اسلامي نظام نړیوال نشي زغملی او له بېلا بېلو لارو کوښښ کوي چې دا نظام زیانمن کړي، خو افغانان به هېڅکله چاته اجازه ورنکړي، چې د اسلامي نظام د کمزوري کولو او یا یې پر وړاندې د بغاوت لپاره هڅې وکړي.

دغو پخوانیو چارواکو او مخورو ویلي؛ ولس د اسلامي امارت لخوا د توشیح شوو قوانینو هرکلی کوی، خو له لویدیځو افکارو اغېزمن او د غربي فکر لرونکي کسان به د اسلامي قانون مخالفت او غندنه کوي.

نوموړو زیاته کړې، د اسلامي امارت د زعیم فرمانونه د اسلامي نظام برخه ده او له اسلام نظام څخه ملاتړ د مسلمانانو دیني مسولیت دی.

د ریاست الوزرا سیاسي مرستیال مولوي عبدالکبیر میلمنو ته د ښه راغلاست ترڅنګ له هغوی مننه کړې، چې خپلې مشورې او نظرونه له اسلامي امارت سره شریکوي.

مولوي عبدالکبیر ویلي؛ اسلامي امارت د پخواني او تېرې جهادي دورې هیلې پوره کړې او ثابته یې کړه، چې د جهاد له پای ته رسېدو وروسته افغانان د ناخوالو پر ځای د خپلواک نظام څښتنان او په امن کې ژوند کوي.

نوموړي زیاته کړې، اسلامي امارت اصلاحي مشورو او نظرونو ته ارزښت ورکوي او هر افغان کولی شي په مستقیم ډول خپل نظرونه له مسولینو سره شریک کړي او د امارتي ادارو دروازې د خلکو پر مخ پرانیستې دي.

د ناستې په پای کې مولوي عبدالکبیر ویلي، اسلامي امارت د قوانینو برخې ته پام لري او میلمنو ته یې ډاډ ورکړی، چې پر سلا او وړاندیزونو به یې غور وشي.

د احصایې او معلوماتو ملي اداره وایي؛ د پکتیا ولایت د احصایې او معلوماتو ریاست د خدمتونو وړاندې کولو په بهیر کې د اسانتیاوو او د برېښنا له پرې کېدو څخه د مخنیوي په موخه د دې ریاست په انګړ کې د لمریزې برېښنا سیسټم چې په ساعت کې د ۱۱ کیلو واټه برېښنا د تولید ظرفیت لري پرانېستل شو.

په دې اړه د پکتیا د احصایې او معلوماتو رییس مفتي محمد اصف قرار ویلي؛ ۲۲ لمریزې تختې د ۴۱۹زره افغانیو په لګښت لګول شوې دي، چې په فعالېدو سره یې د دې ریاست اداري کارونه په سم ډول ترسره، د برېښنا د کموالي ستونزه حل او د خدمتونو د وړاندې کولو پرمهال به د برېښنا له پرې کېدو څخه مخنیوي وشي.

د احصایې او معلوماتو ملي اداره هېوادوالو ته د چټکو او پر وخت خدمتونو وړاندې کولو ته ژمنه ده او هڅه کوي چې د خپلو هېوادوالو له‌پاره لا زیاتې اسانتیاوې برابرې کړي.

د رياست الوزرا اداري مرستيال مولوي عبدالسلام حنفي نن ماسپښين له یوه بهر مېشتي ډاکټر عبدالهادي کريم سره لیدنه کړې.

د دې لیدنې په پيل کې ډاکټر عبدالهادي کريم بېلابېلو برخو ته د اسلامي امارت په پاملرنې خوښي ښودلې او ویلي يي دي؛ غوره روغتيايي خدمتونو ته لاسرسی د هېوادوالو جدي اړتيا ده، چې خوشبختانه اسلامي امارت دې برخې ته ځانګړې پاملرنه لري او په دې برخه کې یې مهم کارونه ترسره کړي دي.

ډاکټر عبدالهادي کريم همداراز د ډاکټرانو او متخصصينو د ظرفيت لوړولو، د معياري لابراتوارونو جوړولو او د هېواد په روغتيايي مرکزونو کې د وړ او مسلکي ظرفيت لرونکو کسانو جذب ته اشارې له مسولينو غوښتنه کړې، دې برخې ته ځانګړې پاملرنه وکړي.

د رياست الوزرا اداري مرستيال په دې لیدنې د خوښۍ څرګندولو ترڅنګ ویلي؛ اسلامي امارت په مختلفو په ځانګړي ډول د روغتيا په برخه کې خلکو ته د غوره خدمتونو وړاندې کول خپل مسوليت بولي او په دې برخه کې به هېڅ ډول هڅې درېغ نه کړي.

مولوي عبدالسلام حنفي د روغتونونو او روغتيايي مرکزونو معياري کولو لپاره د اسلامي امارت د پروګرامونو يادونه کړې او په بهر کې له مېشتو ټولو ډاکټرانو او متخصصينو څخه يې غوښتي، چې خپل هېواد ته راستانه شي او د ناروغانو د درملنې ترڅنګ په پرمختګ کې هم برخه واخلي.

نوموړي د وړانديزونو په اړه ویلي، اسلامي امارت به په ټولو امکاناتو ورته رسېدنه کړې.

د اوبو او انرژۍ وزارت وايي؛ د دې وزارت وزیر ملا عبداللطیف منصور د خپل کار په دفتر کې د دغه وزارت د دفتر د عمومي رییس قاري محمد عبدالعزیز عزیز او یو شمېر نورو رییسانو په شتون کې د Good rich logistic هندي شرکت له رییس شوراب شرما او د ګرین سټیټ پاور شرکت له مشر سره لیدنه کړې.

یاد وزارت زیاته کړې، په دې لیدنه کې د ارغندۍ د ۵۰۰ کیلو ولټ سب سټيشن د تسلیمولو او د ټرانسفرمرونو د لېږد د څرنګوالي په اړه خبرې شوې دي.

دغه لیدنه کې د اوبو او انرژي وزیر د یادو شرکتونو له مسولینو سره د ارغندۍ د ۵۰۰ کیلو ولټ سب سټيشن د تسلیمولو او د ټرانسفرمرونو د لېږد په هکله د اړینو خبرو وروسته، اړوندو مسولینو ته په دې هکله اړینې لارښوونې کړي او ویلي يي دي، د یاد سب سټيشن د تسلیمولو او د ټرانسفرمرونو د لېږد د څرنګوالي په تړاو دې اړین اقدامات ترسره شي.