د مالیې وزارت ویلي؛ د یاد وزارت د ګمرکونو لوی ریاست سوداګرو ته د اسانتیاو رامنځته کولو او د ګمرکي طی مراحلو د لا چټکتیا په موخه د کابل، شېرخان بندر، ابو نصر فراهي او پکتیکا په ګمرکونو کي د څلورو پایو لوړ تناژ لرونکو تلو د بیارغولو چارې د ۱۰.۵ میلیونه افغانیو په ارزښت پیل کړې.

یادي تلې د اسلامي امارت له بیا ځلي حاکمیت څخه وړاندې په غیر معیاري ډول نصب شوې وې، چې اکثره وخت به یې تخنیکي ستونزې پیدا کولې او ګمرکي چارې یې له ځنډ سره مخ کولې.

یاد وزارت زیاته کړې، د دغو ګمرکي تلو په جوړولو سره به ټولې ستونزي حل شي.

د یادونې وړ ده، چې د یادو تلو د بیارغولو لګښت د مالیې وزارت له پراختیایي بودیجې څخه ورکول کېږي، چې په دوه نیمو میاشتو کې به ترمیم او ګټي اخیستنې ته وسپارل شي.

د ریاست الوزرا سیاسي مرستیال مولوي عبدالکبیر نن د کابل د پغمان ولسوالۍ له یو شمېر علماوو او قومي مشرانو سره ولیدل.

 په دې لیدنه کې قومي مشرانو او علمای کرامو وویل، د اسلامي امارت د واکمنۍ په موده کې په پغمان کې لسګونه دښمنۍ په دوستۍ بدلې شوې او خوښ یوو چې مسولین یې شپه او ورځ د خلکو په خدمت بوخت دي.

 یادو علمای کرامو او قومي مشرانو د ولسونو د انسجام او د ستونزو د حل له امله د ریاست الوزرا سیاسي معاونیت هڅې وستایلې او وې ویل، د پغمان ولسونه له اسلامي امارت سره همکار دي او هیچا ته به اجازه ورنکړي، چې د اسلامي نظام پر وړاندې ودرېږي.

همداراز د پغمان قومي مشرانو او علماوو د دې ولسوالۍ د اوسېدونکو د ستونزو د حل په موخه خپل وړاندیزونه هم د ریاست الوزرا سیاسي مرستیال سره شریک کړل.

 د ریاست الوزرا سیاسي مرستیال مولوي عبدالکبیر د پغمان قومي مشرانو او علمای کرامو ته د ښه راغلاست پر مهال وویل، د جهاد له بریا وروسته اسلامي امارت افغان ولس ته خدمات برابروي او د اسلامي امارت ټولې کړنې د خلکو د غوښتنو او د هېواد د ګټو پر اساس ترسره کېږي.

د ریاست الوزرا سیاسي مرستیال زیاته کړه، اسلامي امارت د مسول نظام په توګه د افغانانو مشورو او وړاندېزونو ته د قدر په سترګه ګوري او د ستونزو د حل لپاره یې هلې ځلې کوي.

 مولوي عبدالکبیر د اسلامي امارت بریا ته په اشارې وویل، د ولس د ملاتړ او همکاریو له امله په کور دننه اسلامي نظام په مخ کې هیڅ خنډ نه لري او په پوره ډاډ سره د حکومتولۍ چارې ترسره کېږي.

 د ریاست الوزرا سیاسي مرستیال له اسلامي امارت سره د پغمان د ولسونو او مشرانو همکاري وستایله او د دوی وړاندېزونو ته د رسېدنې ډاد یې ورکړ.

د افغانستان اسلامي امارت د اسرائیلو صهيونيستي رژيم د چارواکو هغه څرګندونې په کلکو ټکو غندي چې ويلي و، د اقصي مبارک مسجد په دننه کې به يهودي کنيسه جوړوي.

دغسې څرګندونې په ډاګه کوي چې صهيونيستي رژيم نه يوازې دا چې هيڅ نوع مقدساتو، نړيوالو قوانينو او اصولو ته درناوی نلري، بلکې په ډيره ناسنجیده توګه دغه ټول اصول، قوانين او ارزښتونه تر پښو لاندې کوي او د مسلمانانو د لومړۍ قبلې او سپيڅلي مسجد اقصی په اړه د داسې غاصبانه څرګندونو په کولو د نړۍ د ټولو مسلمانانو احساسات پاروي.

د افغانستان اسلامي امارت د اقصی په ګډون د فلسطين ټوله خاوره د فلسطینیانو حق ګڼي او اقصی د مسلمانانو د لومړۍ قبلې په توګه پيژنې، په قدس شريف کې د اسرائيلي غاصب رژيم هر ډول تصرف غير قانوني او د منل شوو واقعاتو خلاف عمل دی.

موږ يو ځل بيا د اسلامي نړۍ پر واکمنانو او د نړۍ په هېوادونو او سازمانونو غږ کوو، چې پر فلسطين د غاصب صهيونيستي رژيم د ناروا وحشيانه يرغل په وړاندې ودريږي او په غزه کې د روانې ټولوژنې او بشري جنايتونو مخه ونيسي، همدا ډول اسرائیلي غاصب چارواکي هم له دا ډول غیر مسئولانه څرګندونو څخه را وګرځوي.

د الجزیرې نړیوالې خبري شبکې د څېړنې له مخې؛ پر غزه تړانګه د تېر اکټوبر میاشتې له ۷مې راهیسې د صهیونیستي رژیم په بریدونو کې له ۴۰ زره زیات فلسطینیان شهیدان شوي، چې شاوخوا ۱۷ زره یې ماشومان دي.

دا ۱۷ زره ماشومان د غزې تړانګې د ټولو ماشومانو ۲.۶ سلنه جوړوي.

د یادې څېړنې پر اساس؛ پر غزه د صهیونیستي رژیم د بریدونو ۳۲۰ ورځې پوره شوې، چې په دې موده کې په ورځني ډول یا هره ورځ ۵۳ ماشومان او ۷۲ نارینه او ښځې شهیدان شوي. دغه‌راز لږ تر لږه ۱۰ زره نور تر خاورو لاندې دي.

د الجزیرې په څېړنه کې ویل شوي، چې د ۴۰ زره شهیدانو ۱۸.۴ سلنه ښځې او ۳۳ سلنه ماشومان دي، حال دا چې د تېر اکټوبر له ۷مې وړاندې د غزې د دوه میلیونه نفوس نږدې نیمايي ماشومان وو.

د یاد راپور له مخې؛ له ۵۰۰ زیات ښوونځي چې د پناه ځای په توګه کارول کېدل، په نښه شوي چې ډېری یې ویجاړ او له منځه تللي دي.

اسرائیلي یرغلګرو د ۲۰۲۳ زېږدیز کال اکټوبر میاشتې په ۷مه پر غزه بریدونه پیل کړي، چې اوس یې ۳۲۰ ورځې پوره کېږي.

د دې ۱۰ میاشتنۍ جګړې له امله د فلسطیني ماشومان یو ښوونیز کال هم ضایع شوی دی.

د دفاع وزارت ویلي؛ د ۲۰۱ خالد بن ولید رض قول اردو له ښوونیز مرکز څخه ۶۹۰ تنه ځوان منسوبین د درې مياشتنیو بېلابېلو مسلکي زده کړو وروسته د يو لړ مراسمو په ترڅ کې فارغ شول.

دغو مراسمو کې ملي دفاع وزارت پلاوي، د قول اردو قوماندان مولوي عبدالصبور ابودجانه، د ملي دفاع پوهنتون قوماندان مولوي محمد هاشم حذیفه، د لغمان والي شيخ الحديث شير احمد حقاني او ګڼ شمېر مسولینو ګډون کړی وو.

په جوړو شویو مراسمو کې مسولینو ویلي؛ څنګه چې مو ۲۰ کاله جهادي مبارزه وکړه او ثمره مو ترلاسه کړه، لدې وروسته به هم د اسلامي نظام او هېواد ساتنې ته چمتو اوسو.

دوی په خپلو خبرو کې فارغ شویو ځوان منسوبینو ته زیاته کړې؛ مادیات او د لویو موقفونو شوق څخه ځانونه وساتئ، د بیت المال ښه ساتنه وکړئ، له خپل مسولیت څخه غلطه استفاده ونکړئ، ترڅو د اسلامي نظام د بدنامۍ سبب ونه ګرځي.

د ریاست الوزرا سیاسي مرستیال مولوي عبدالکبیر نن په سپېدار ماڼۍ کې د بدخشان او بغلان ولایتونو له یو شمېر قومي مشرانو او مخورو سره جلا جلا ولیدل.

په پیل کې د بدخشان قومي مشرانو وویل، د بدخشان ولسونه د اسلامي امارت په راتګ او په هېواد کې د اسلامي نظام په ټینګښت خوشحاله او ورسره همکار دي.

یادو مشرانو په هېواد کې د سرتاسري امنیت پر ټینګښت او د پراختیايي پروژو په عملي کېدو خوښي ښودلې او په بدخشان کې یې د کلینیکونو، ښوونځیو او سړکونو د رغولو ترڅنګ په بېلابېلو برخو کې د دې ولایت د خلکو ستونزې د ریاست الوزرا سیاسي مرستیال سره شریکې کړې.

همدارنګه په یوه بله لیدنه کې د بغلان یو شمېر قومي مشرانو په بېلابېلو برخو کې خپلې ستونزې او وړاندیزونه د ریاست الوزرا سیاسي مرستیال سره شریک او په یاد ولایت کې یې د پراختیايي پروژو د پلي کېدو غوښتنه هم وکړه.

وروسته د ریاست الوزرا سیاسي مرستیال وویل، اسلامي نظام په ټولو افغانانو پورې اړه لري او له هر ډول تبعیض پرته په ټول هېواد کې د متوازن انکشاف لپاره هڅې کوي.

مولوي عبدالکبیر څرګنده کړه، اسلامي امارت هڅه کوي د پراختیايي پروژو په عملي کولو سره د بېکارۍ ستونزه مهار او د هېوادوالو اساسي ستونزې حل کړي.

د ریاست الوزرا سیاسي مرستیال د خپلو خبرو په پای کې د بدخشان او بغلان ولایتونو راغلو مشرانو او مخورو ته د دوی د ستونزو د حل ډاډ ورکړ او ويي ویل، اړوندو ادارو ته به یې په اړه لازمې سپارښتنې وکړي.

د عامې روغتیا وزیر مولوي نور جلال جلالي په خپل کاري دفتر کې د یو شمیر نړیوالو موسسو له مسولینو او استازو سره لیدنه کړې.

په دې لیدنه کې د روغتیايي خدماتو پر کیفیت، په سپینو ساحاتو کې د روغتیايي مراکزو پر جوړولو، د موازي پروژو پر اوږدمهاله موثرو پروژو مدغم کېدنې، او د روغتیايي خدماتو اړوند له وزارت سره پر دوامداره همغږۍ خبرې شوې دي.

په دې ناسته کې چې د نږدې ۱۴ نړیوالو موسسو مسولینو او استازو شتون درلود، د عامې روغتیا وزارت سره یې پر همغږۍ د تاکید ترڅنګ شته ستونزې د عامې روغتیا وزیر له وزیر سره شریکې کړې.

مولوي نور جلال جلالي د ستونزو د حل په موخه د ډاډ ورکولو ترڅنګ ولسونو ته د ښو خدماتو پر وړاندې کولو ټینګار کړی او ویلي يي دي؛ روغتیايي خدمات باید معیاري او اړمن خلک ترې په غوره شکل برخمن شي، چې په دې برخه کې د عامې روغتیا وزارت د خپلې داخلي بودیجې ترڅنګ له نړیوالو مرستندویه ادارو او موسسو سره هر ډول مشروع همکارۍ او دوه اړخیزې همغږۍ ته تیاری لري.