د ریاست الوزرا سیاسي مرستیال مولوي عبدالکبیر د کابل طبي علومو پوهنتون د ۱۴۰۳ لمریز کال د محصلینو په فراغت غونډه کې ګډون او وینا کړې.
په دې غونډه کې د لوړو زدهکړو وزیر شېخ ندا محمد ندیم، د پوهنتون استادانو، علماوو او ځوانانو ګډون کړی و.
د ریاست الوزرا سیاسي مرستیال تازه فارغو شویو ډاکټرانو او د هغوی کورنیو ته مبارکي ورکړې او ویلي يي دي، ټولنه دغو ځوانو کادرونو او ډاکټرانو ته اړتیا لري.
مولوي عبدالکبير زیاته کړې؛ د افغانستان روغتیايي سکتور د منفي تبلیغاتو، مافیايي کړیو او د روغتیايي مرکزونو د کمزوري ظرفیت له امله بې اعتباره شوی وو او ناروغان به د درملنې لپاره ګاونډیو هېوادو ته تلل، خو د اسلامي امارت په راتګ سره په هېواد کې مافیايي کړۍ له منځه لاړې، اصلاحات رامنځته شول او کوښښ کېږي، چې د روغتیايي خدماتو کیفیت هم لوړ شي.
سیاسي مرستیال په هېواد کې د باکیفیته روغتیايي خدماتو په عرضه کولو د ټینګار ترڅنګ ویلي، ډاکټران او د روغتیا برخې پانګوال او سوداګر دې د افغانانو کمزوري اقتصادي وضعیت ته په کتو هېواد ته با کیفیته درمل را وارد کړي.
مولوي عبدالکبير د لېرې پرتو سیمو اوسېدونکو په شمول ټولو هېوادوالو ته د روغتیايي خدماتو د عرضه کولو په برخه کې په ټینګار روغتیا وزارت ته سپارښتنه کړې، چې د روغتیايي خدماتو او درملو کیفیت وڅاري.
د ریاست الوزرا سیاسي مرستیال له نړیوالو مرستندویه ادارو او د روغتیا نړیوال سازمان څخه غوښتي، چې په افغانستان کې له روغتیايي سیستم سره خپلې مرستې ډېرې او ټولو افغانانو ته د باکیفیته خدماتو په عرضه کولو کې ونډه واخلي.
مولوي عبدالکبير په ملي او نړیوالو پانګوالو هم غږ کړی، چې د روغتیا په تخصصي برخه کې پانګونه وکړي او اسلامي امارت به ورته لازم سهولتونه برابر کړي.
همدارنګه يې زياته کړې، اوس په ټول افغانستان کې سرتاسري امنیت ټینګ شوی دی او د ډاکټرانو په شمول هېڅوک د غلا، اختطاف او نورو پېښو اندېښنه نه لري.
د رياست الوزرا سياسي مرستيال ویلي؛ نن تاسې دلته د مسلمان، افغان او مجاهد ورور درملنه کوئ، چې همدې ورور ستاسې لپاره امن راوستی، نن په افغانستان کې وحشت، بربریت او قوم جنګي نشته، بلکې سرتاسري امنیت شتون لري.
محترم مولوي عبد الکبير د خپلو خبرو په پای کې ویلي، تېرو حکومتونو د افغانستان د ابادولو هوډ نه درلود او د روغتیايي سکتور په شمول یې د افغانستان سیستمونه له ستونزو سره مخ کړي وو.
