کرنې وزارت وايي؛ د دې وزارت مالي او اداري مرستیال ملا اغاجان اخوند کندوز ته د خپل سفر په ترڅ کې د دې ولایت له والي ملا نثار احمد نصرت او د دغه ولایت له سیمه ییزو چارواکو سره لیدنه کړې.

د کرنې وزارت د مالي او اداري مرستیال د سفر موخه، د کروندګرو د اضافي غنمو د پېرودل او زېرمه کول، د عشر او زکاتو راټولو په برخه کې د همغږي رامنځته کول، د عایداتي سرچینو پېژندنه او زیاتوالی، د مخابراتي انټنونو تشخیص او د کرنې ریاست د فعالیتونو او کارکوونکو ارزول دي.

د کرنې وزارت مالي او اداري مرستیال په دې لیدنه کې ویلي؛ د امیرالمؤمنین حفظ الله د حکم پر اساس، له هغو ولایتونو څخه چې د غنمو ډېر تولید لري اضافي غنم وپېرل او زېرمه کېږي، موږ د چارواکو په همغږۍ دغه پلان پلي کوو، د ولایت د اړتیا وړ غنم په خپله د ولایت په ګدام کې زېرمه کېږي او پاتې نور یې سیلو ته انتقالېږي.

د کندوز والي ملا نثار احمد نصرت ویلي؛ د کندوز ولايت د افغانستان د کرنيزو محصولاتو کندو دی، د غنمو ترڅنګ د دې ولایت وریجې او خټکي هم ځانګړې شهرت لري، موږ د پلانونو په پلي کولو کې همغږي یو.

همداراز د کرنې وزارت د ستراتیژیکو زېرمو رییس مولوي قدرت الله حقیار ویلي؛ موږ د بزګرانو اضافي غنم پېرو او زېرمه کوو یې او د بېړنیو حالاتو او د غنمو د بیو د لوړېدو په صورت کې یې بازار ته وړاندې کوو.

نوموړي زیاته کړې؛ په پیل کې موږ دا غنم په مستقيم ډول له کروندګرو څخه پېرو که کروندګر په کافي اندازه غنم ونه لري، موږ به يې له کرنیزو شرکتو او ازاد بازار څخه وپېرو او زېرمه کوو یې.

د امریکا د بهرنیو چارو وزارت یوه ویاند فاکس نیوز سره په خبرو کې ویلي، دغه هېواد په افغانستان کې له وسله‌والې جګړې ملاتړ نه کوي.

 د نوموړي په وینا، امریکا نه غواړي چې یو ځلې بیا په افغانستان کې جګړه توده شي.

د یادونې وړ ده، چې تېر کال د بریټانیا د بهرنیو چارو وزارت هم ویلي و، چې د اسلامي امارت پر وړاندې د جګړې ملاتړ نه کوي او دا د افغانستان په ګټه هم نه بولي.

یاد وزارت ټینګار کړی و، چې له اسلامي امارت سره د تعامل پرته بله لار نشته.

د ملي دفاع وزارت وایي، د ۲۰۳ منصوري قول اردو اړوند په دویمه پلې لوا کې ۳۲ عرادې بېلا بېل ډول پوځي وسايط ترمیم او ګټې اخیستنې ته وسپارل شول.

یاد وزارت زیاتوي، په دغه وسایطو کې هاموې، امراپ ټانکونه، انټرنېشنل، رېنجر موټر او موټر سایکل شامل وو.

د یادونې وړ ده، چې له دې وړاندې هم زیات شمېر عارضه دار وسایط د لوا د منسوبینو په لارښونه ترمیم او ګتې اخیستنې ته سپارل شوي دي.

د سرحدونو، قومونو او قبایلو چارو وزارت وايي؛ د دې وزارت وزیر ملا نورالله نوري، د جرګو او قبایلي چارو د همغږۍ مرستیال مولوي محمد علي جان احمد، د جرګو رییس شیخ حضرت ولي حقاني، د دعوت او ارشاد رییس مفتي شفیع الله ثاقب او مل پلاوي غور ولایت ته د خپل سفر په ترڅ کې د دوو لویو قومونو تر منځ شاوخوا ۱۰۰ کلنې سترې دوښمني ته د پای ټکی کېښود.

دغه دوښمني چې په غور ولایت کې د سردارخېلو او تایمني په نامه د دوو قومونو ترمنځ پېښه شوې وه، چې له کبله یې د څه باندې یوې پېړۍ په اوږدو کې سلګونه مړي، زخمیان او بې شمېره مالي زیانونه تر شا پرې ایښي وو، د تېرې جمعې په ورځ د ملا نورالله نوري په مشرۍ د یاد ولایت د والي مولوي احمد شاه دین دوست، د علماوو شورا د رییس مولوي ګل احمد متوکل، د علماوو شورا د غړو او نورو محلي مسولینو په مرسته په سوله بدله شوه.

دا شخړه چې د دوی په وینا د زرهاوو جریبه ځمکې پر سر له یوې پېړۍ راهیسې روانه وه، د تېرو حکومتونو په دوران کې هم د دوی ترمنځ ډېر ځله د سولې پرېکړې شوې وې، چې د ښکېلو لوریو د نارضایتي له امله نا حل پاتې وه او د دوی ترمنځ اوس هم ژور اختلافات موجود و، خو د سرحدونو، قومونو او قبایلو چارو د وزیر ملا نورالله نوري په رهبري، د غور د والي، د علماوو شورا رییس او د نورو محلي مسولینو په هلوځلو او منځګړیتوب یې پای وموند.

ښاغلي نوري او مل پلاوي د هغو ځمکو د څېړنې او لیدنې په موخه دولت یار ولسوالي ته سفر کړی، د کومو پر سر چې دواړو قومونو لانجه درلوده، د سیمې تر کتنې وروسته یې د دواړو لوریو اسناد بررسي کړل، له دوی څخه یې اختیار لیکونه واخیستل او د دواړو خواوو په اړه یې د خیر فیصله وکړه چې وروسته یې د یوې ناستې په ترڅ کې د طرفینو په شتون کې ابلاغ کړه.

د ناستې پر مهال دواړو خواوو په دغه پرېکړه رضایت ښودلی او ډاډ یې ورکړی، چې دوی په دغه فیصله رضایت لري او دا له تېرو لسګونو کلونو را وروسته د غور پر ولس ځانګړی رحم دی، دوی ژمنه وکړه چې نور به له یو بل سره د وروڼو په څېر ژوند کوي، یو بل ته به هيڅ کوم خنډ نه جوړوي او له ځایي مسولینو یې د فیصلې د تطبیق په برخه کې د همکاري غوښتنه کړې.

ولسونو د دغې پریکړې تود هرکلی کړی.

بهرنیو چارو وزارت وایي، د بهرنيو چارو وزير مولوي اميرخان متقي د کاميرون پلازمېنې ياوندي کې د اسلامي همکارۍ سازمان د بهرنيو چارو وزيرانو شورا د ۵۰مې ناستې په څنډه کې د سعودي عربستان، ترکيې، قطر، اذربايجان، عُمان، اندونيزيا، ایران، فلسطین، سومالیا او نورو هېوادونو له استازو او د اسلامي همکارۍ سازمان او اړوندو تخصصي ادارو له مسولينو سره جلا – جلا ناستې کړې دي.

یاد وزارت زیاته کړې؛ په دغو ناستو کې له اړوندو لوریو سره د دوه اړخيزو اړيکو پر پياوړتيا، او په بېلابېلو ډګرونو کې د همکارۍ د نوو زمینو پر رامنځته کولو خبرې کړې دي.

د بادغیس مطبوعاتي دفتر د یوې خبرپاڼې په خپرولو سره ویلي؛ د اسلامي امارت زعیم رهبر عالیقدر امیرالمؤمنین حفظه‌الله یاد ولایت ته د سفر په ترڅ کې د دغه ولایت له والي مولوي عبدالصمد جاوید، سیمه‌ییزو مسولینو او مجاهدینو سره لیدنه کړې.  

په دې لېدنه کې عالیقدر امیرالمؤمنین حفظه‌الله د اسلامي نظام د پیاوړتیا، د شریعت د پلي کېدو، د سپیڅلي جهاد او موخو د ساتنې، د هېواد د مومنو بچیانو ترمنځ د اسلامي زده‌کړې د ترویج او د امیرانو د اطاعت او تر لاس لاندې کسانو باندې د شفقت په اړه خبرې کړې دي.

ورته مهال د اسلامي امارت رهبر خلکو  ته د خدمت کولو په تړاو یو شمېر لازمې سپارښتنې هم کړې دي.

د یادونې وړ ده، چې دا لومړی ځل دی چې د اسلامي امارت زعیم رهبر عالیقدر امیرالمؤمنین حفظه‌الله بادغیس ولایت ته کړی دی.