پرون (دوشنبه د چنګاښ په ۲۵مه) له ماسپښين وروسته د شدید، توپان او ږلی له امله د ننګرهار په مرکزي ښار جلال اباد او بېلابېلو ولسوالیو اوسېدونکو ته درانه مالي او ځاني زیانونه اوښتي.
د ننګرهار د اطلاعاتو او کلتور ریاست مسولین وايي، چې د دې ولایت په مرکز او یو شمېر ولسوالیو کې شدیدو ورښتونو او توپانونو خلکو ته درانه ځاني او مالي زیانونه اړولي دي.
د ننګرهار حوزوي روغتون مسولین وايي، چې تر دې مهاله تر ۳۵ شهیدان او ۲۳۰ پورې ټپيان ور وړل شوي دي.
د لومړنیو شمېرنو له مخې د جلال اباد او مختلفو ولسوالیو اړوند تر ۴۰۰ کورونه تخریب شوي دي.
دغهراز د برېښنا مزي پرې شوي، د مخابراتي شبکو پایې غورځېدلې او په بېلا بېلو ولسوالیو کې مېوه لرونکې او بېمېوې ونې چپه شوې دي.
مسولین پېښو ته د رسېدنې په موخه سیمې ته رسېدلي او خلک ته یې لومړني خدمات وړاندې کړي دي.
د افغانستان اسلامي امارت د یوې اعلامیې په خپرولو سره ننګرهار کې د شدیدو ورښتونو او توپانونو له امله د شهیدانو او ټپيانو له کورنیو سره ژوره خواخوږي ښودلې.
دې اعلامیه کې راغلي: “ټولو اړوند اورګانونو ته لارښوونه شوې، چې هرڅه عاجل سیمو ته ځان ورسوي او د شهیدانو او ټپيانو د انتقال لپاره ګامونه واخلي، بې ځایه شویو کورنیو ته د سرپناه، خوراک او دوا په رسولو کې هڅې وکړي.
دغه راز نظامي اورګانونو ته هم لارښونه شوې، چې د خلکو د ژغورنې په برخه کې له شته امکاناتو څخه استفاده وکړي.”
د دې تر څنګ ویجاړوونکو سیلابونو لغمان، کونړ، پنجشېر، کاپیسا او میدانوردګو ولایتونو کې ګڼې ویجاړۍ رامنځته کړې دي. کرنیزو ځمکو ته پراخ زیانونه اوښتي، کورونه ویجاړ شوي او حکومتي مسولین او د سیمې اوسېدونکي د خلکو د ژغورولو هڅې کوي.
ننګرهار کې زیات شمېر هېوادوال د وینې ورکولو په موخه سیمهییز روغتون ته ورغلي او ټپیانو ته یې وینه ورکړې ده.
طبیعي پېښو ته د رسېدو په چارو کې د دولت وزارت ویاند ملا جانان سایق وايي، چې سېلابونو په ټولو اوو ولایتونو کې ویجاړۍ رامنځته کړې، خو د سر او مال ډېر زیان په ننګرهار کې اوښتی دی.
نوموړی زیاتوي، چې تقریبا ۴۰ هېوادوالو خپل ژوند بایللی او تقریبا تر ۲۸۰ پورې هېوادوال ټپیان شوي. په ډېره کچه د هېوادوالو زراعتي ځمکې او کورونه تخریب شوي. کونړ کې د یوه کور د نړېدو له امله پینځه کسان وژل شوي. جلال اباد او لغمان کې هم ډېرو هېوادوالو ته زیانونه اوښتي دي.