د افغانستان د کورني کرېکټ پرمختګ څانګې په همکارۍ د ځوانانو راډیو له لوري د اته ولایتونو ترمنځ د روانو ۲۰ اوریزو کرېکټ سیالیو په لړ کې تېره ورځ د خوست کرېکټ لوبډلې د پکتیا کرېکټ لوبډلې ته د ۹۹ منډو په توپیر ماتې ورکړه او د یادو سیالیو بل پړاو ته یې لار وموندله.
دغه سیالۍ د خوست ولایت په رحمتولي مسرور کرېکټ لوبغالي کې ترسره شوه، چې خوست ولایت لوبډلې په لومړۍ توپوهنې سره په ټاکلیو ۲۰ اورونو کې د دوه ویکټو پر مټ ۲۲۲ منډې جوړې کړې او سیالې پکتیا لوبډلې ته یې ۲۲۳ منډې هدف وټاکه.
په ځواب کې پکتیا لوبډلې د لوبې په ۱۶.۱ اورونو کې د خپلو ټولو لوبغاړو پر مټ ۱۲۳ منډې جوړې کړې او لوبه یې د ۹۹ منډو په توپیر وبایلله.
دغه سیالۍ کې عمران دلپوری د غوره توپاچونکي په توګه، ایمل شاهین د غوره توپوهونکي په توګه او صابر ګربز بیا د لوبې د غوره لوبغاړي په توګه ونومول شول.