د اسرائیلي رسنیو د راپورونو له مخې، تېره اونۍ د غزې په شمال کې ۱۰ اسرائیلي عسکر وژل شوي دي.
اسرائیلي رسنۍ وايي، چې یوازې پرون (شنبه، د مرغومې ۲۲مه) د غزې په شمال بیتحانون کې ۴ اسرائیلي عسکر وژل شوي او په دې سره په تېره اونۍ کې د وژل شویو اسرائیلي عسکرو شمېر ۱۰ ته لوړ شوی دی.
د راپورونو له مخې، تېره چهارشنبه هم ۳ صهیونیستي عسکر او په تېرو دوو ورځو کې ۳ نور اسرائیلي عسکر د غزې په شمال کې وژل شوي وو.
د غزې په شمال کې د اسرائیلي یرغلګرو د درې میاشتنیو عملیاتو او کلابندۍ په لړ کې ۴۸ اسرائیلي عسکر وژل شوي دي.
حال دا چې په غزه کې د جنګېدونکو اسرائیلو عسکرو والدینو په نتانیاهو نیوکه کړې او په یوه پرانیستي لیک کې یې ویلي؛ موږ اجازه نه درکوو، چې اولادونه مو د توپ د خوراک په توګه قرباني کړئ.
دا پرانیستی لیک چې د اسرائیلي عسکرو ۸۰۰ والدینو نتانیاهو ته لیکلی و، د تېرې پنجشنبې په ورځ خپور شو.