د اوبو او انرژي وزیر ملا عبداللطیف منصور، د پروان والي مفتي محمد ادریس، د کاپیسا مرستیال والي شیخ اسدالله سنان، په افغانستان کې د چین سوداګریزه اتیشه او د پلاوي یو شمېر نورو غړو په ملتیا د کاپیسا ولایت د باغدرې برېښنا بند سیمې ته سفر کړی او د دغه بند د جیوفزیک او جیوتخنیک د مطالعاتو له بهیر څخه یې له نږدې لیدنه کړې.
د اوبو او انرژي وزیر ملا عبداللطیف منصور د بند له سیمې څخه د لیدنې پرمهال د هغه بنسټیز ارزښت ته اشاره کړې او د انرژي د پراختیا په لار کې یې د یاد بند مطالعات یو مثبت ګام بللی.
ښاغلي منصور د چین د سفارت مسولینو ته په خطاب کې ویلي؛ په دې پروژه کې پانګونه نه یوازې د دواړو هېوادونو ترمنځ د همکاریو یو عملي اقدام دی، بلکې تمه ده چې په راتلونکي کې هم د پانګونې لپاره نورې سترې پروژې هم شریکې شي.
په ورته مهال، د چین سفارت سوداګریزې اتیشې هم د لوګر ولایت د مس عینک کان د را اېستلو پروژې د برېښنا د برابرولو په برخه کې د دغې پروژې پلي کول ارزښتناک بللي او ژمنه یې کړې، چې هېواد یې هوډ لري، په راتلونکې کې د افغانستان د اوبو او انرژۍ په برخو کې خپلې پانګوالې همکارۍ پراخې کړي.
د یادونې وړ ده، چې د باغدرې بند د اوبو او انرژۍ وزارت له مهمو پروژو څخه شمېرل کېږي، چې د څه باندې ۲۴۰ میګاواټه برېښنا د تولید وړتیا لري.
یاده پروژه د چین د MCC شرکت (د مس عینک کان قراردادي شرکت) لهخوا تمویلېږي، چې له پلي کېدو سره به یې د مس عینک کان د برېښنا اړتیا هم پوره شي.