د افغانستان لپاره د پاکستان ځانګړي استازي محمد صادق خان د اسلامي امارت د بهرنیو چارو له وزیر مولوي امیرخان متقي سره لیدنه کړې.
د هېواد د بهرنیو چارو وزیر د روان وضعیت په اړه په تفصیل سره خبرې کړې او د افغانستان او پاکستان په اړیکو او د دواړو هېوادونو تر منځ یې په یو لړ مسائلو او په ځانګړې توګه په دې وروستیو کې د افغان کډوالو د جبري اخراج په اړه خپله ژوره اندېښنه شریکه کړې ده.
مولوي امیرخان متقي ټینګار کړی، چې دواړه هېوادونه باید د باور په فضاء کې خپل مسائل د خبرو اترو له لارې حل کړي او له ټولو هغو اقداماتو او څرګندونو ډډه وکړي، چې د ولسونو د خپګان او احساساتو د پارونې لامل ګرځي.
د پاکستاني پلاوي مشر محترم صادق خان ویلي، چې دواړه ګاونډي هېوادونه پخپل منځ کې ژورې اړیکي لري او د ستونزو د حل لپاره یې باید غور او فکر وشي.
نوموړي زیاته کړې، چې په نږدې راتلونکي کې به د پاکستان د لومړي وزیر مرستیال او د بهرنیو چارو وزیر ښاغلی محمد اسحاق ډار کابل ته سفر ولري او هیله یې څرګنده کړې، چې یاد سفر به دواړو لوریو ته مثبتې پایلې ولري.
د غونډې په پای کې دواړه لوریو د ورته ناستو دوام اړین بللی دی.