د عامې روغتیا وزیر مولوي نور جلال جلالي په خپل کاري دفتر کې د افغانستان لپاره د وګړو صندوق (UNFPA) سازمان له مشر کوابینا اسانتي او د دې سازمان له اجراییوي مرستیال او سرمنشي مرستیال انډریو سابرټن سره لیدنه کړې.
په دې لیدنه کې افغانستان کې د روغتیايي سیسټم د پیاوړتیا، د اړتیا پر ځای د دوامداره مالي ملاتړ، روغتیا برخه کې د مرستو په غوره مدیریت، روغتیايي ځالو پر زیاتوالي، د ګرځنده ټیمونو په موثریت او پر ثابت مرکزونو بدلولو، د عامې روغتیا وزارت د پالیسۍ سره سم د روغتیايي خدماتو وړاندې کولو او د لمړیتوبونو پر بنسټ د خدماتو تر سره کولو اړوند خبرې شوې دي.
د عامې روغتیا وزیر د خپلې وینا په ترڅ کې د روغتیايي خدماتو د لا موثریت او مثمریت په موخه شفافیت او د روغتیا وزارت لمړیتوبونو ته پاملرنه اړینه یاده کړې.
مولوي نور جلال جلالي، د عامې روغتیا وزارت د ملي پالیسۍ اړوند یې د روغتیايي خدماتو په وړاندې کولو او د نړیوالو له لوري د شته مرستو په غوره مدیریت ټینګار کړی.
بل لور د UNFPA سازمان مرستیال، روغتیايي برخه کې پر شافیت خوښي څرګنده او د افغانستان روغتیایي سیسټم سره یې مرستۍ اړینې ګڼلي دي، چې په همدې موخه یې د مرستو را جلبولو ژمنه کړې.