د اسلامي امارت مرستیال ویاند ملا حمدالله فطرت د برېتانیوي ځواکونو له لوري په افغانستان کې د جنګي جنایتونو د اعترافاتو په تړاو ویلي، چې د شلو کلونو په موده کې ټولو اشغالګرو په افغانستان کې بېلابېل جنګي جنایتونه کړي دي.
نوموړي زیاته کړې، د برېتانیوي ځواکونو له لوري په افغانستان کې د دوی پر کړو جنګي جنایتونو اعترافات د افغانانو د هغو خبرو او راپورونو پخلی او تایید کوي، چې د شل کاله اشغال پر مهال د ملکي تلفاتو او جنګي جنایاتونو په اړه خپاره شوي وو.
ښاغلي فطرت په یوه غږیز کلیپ کې ویلي: “دا یو واقعیت و، چې په افغانستان کې ټولو بهرنیو اشغالګرو ځواکونو بېلابېل جنګي جنایتونه کړي وو. تېر شل کاله د امریکا په مشرۍ د ناټو ځواکونو هره ورځ د افغانانو په وژلو او شکنجه کولو بوخت وو.”
د اسلامي امارت د مرستیال ویاند په وینا، د برېتانیا د ځانګړو ځواکونو وروستي اعترافونه دا ثابتوي، چې په افغانستان کې د یرغلګرو ځواکونو له لوري شوي جنایتونه او وحشت تر هغه ډېر زیات دي، چې رسنیز شوي دي.
د برېتانیا د ځانګړو ځواکونو پخوانيو غړو څو کلنه چوپتیا ماته کړې او په افغانستان کې یې د اشغالګرو د پټو وحشتونو او جنایتونو حقایق روښانه کړي دي.
یادو سرتېرو ویلي، چې برېتانیوي ځواکونو به بېوسلې وګړي نیمه شپه په خوب کې وژل، بندیان او ان ماشومان به یې وژل او اعدامول.
د دوی په خبره، برېتانیوي سرتېرو ته د بندیانو وژل په یوه عادي چاره بدله شوې وه.
د ملګرو ملتونو ځانګړي راپور ورکوونکي ریچارډ بینټ هم له دې اعتراف وروسته د جرمونو له عاملینو د حساب ورکولو غوښتنه کړې ده.