د کورنیو بې ځایه شویو د څار مرکز په خپل تازه راپور کې ویلي، چې د تېر ۲۰۲۴ زېږیز کال پر مهال په افغانستان کې ۱.۳ میلیونه وګړي د طبیعي پېښو له امله له خپلو سیمو بې ځایه شوي دي.
که څه هم د اسلامي امارت تر واکمنېدو وروسته په افغانستان کې د جګړو او ورته دلایلو له امله د بې ځایه کېدونکو کچه د پام وړ راکمه شوې وه، خو سره له دې افغانستان لا هم د ۴.۲ میلیونه کورنیو بې ځایه شویو کوربه دی، چې دا د ۲۰۲۴ کال تر پایه د نړۍ پینځم لوړ شمېر دی.
د کډوالو او بېرته راستنېدونکو چارو وزارت وايي، تېر کال کې نږدې ۱۴ زره کورنۍ له یوې سیمې بلې سیمې ته بېځایه شوې دي.
یاد وزارت زیاتوي؛ شاوخوا ۱۱ زره هغه کورنۍ چې د تېرو څو لسیزو کورنیو جګړو او اقلیمي بدلونونو څخه اغیزمنې شوې وې، د یاد وزارت په هڅو خپلو سیمو ته لیږدول شوې دي.
بلخوا د چاپېریال ساتنې ملي اداره وايي، افغانستان یو له هغو هېوادونو څخه دی چې د وچکالۍ او اقلیمي بدلونونو له امله زیات شمېر افغانان د خپلو سېمو پرېښودو ته اړ شوي دي.
یادې ادارې له نړیوالې ټولنې غوښتنه کړې، چې په دغه برخه کې دې خپل مسولیت ادا کړي.
د کډوالو او بېرته راستنېدونکو چارو وزارت د معلوماتو له مخې، په افغانستان کې د تېرو جګړو او نا امنیو، هوايي بریدونو او نظامي چاپو له امله ګڼې کورنۍ بې ځایه شوې وې، چې د اسلامي امارت له بیا واکمنېدو راهیسې د بېځایه کېدو دغه لړۍ په بشپړ ډول پای ته رسېدلې ده.