د الجزیرې د راپور له مخې، پرون سېشنبه پر غزه د اسرائیلي یرغلګرو په بریدونو کې لږ تر لږه ۱۰۵ فلسطینیان شهیدان شوي دي.
په شهیدانو کې لږ تر لږه ۳۲ کسان د مرستو د وېش په مرکزونو کې په نښه شوي او ۵۰ نور د غزې پر ښار په بریدونو کې شهیدان شوي دي.
اسرائیلي یرغلګرو د غزې ښار د نیولو په موخه په دې سیمه کې بې له ځنډه بریدونه جاري ساتلي دي.
د الجزیرې خبریالې ویلي: “د غزې فلسطینیان اوسمهال په قفس کې بند پاتې دي او هڅه کوي، چې د امکان تر حده په پرلهپسې هوايي بریدونو کې ژوندي پاتې شي. هر ځای چې دوی ځي، هوايي بریدونه یې تعقیبوي.”
نوموړې زیاتوي: “دوی همدارنګه د کلابندۍ او د مرستو او خوړو د بندښت له امله مري، ځکه چې د ژوندي پاتې کېدو لپاره لومړنۍ اړتیاوې نشي پوره کولای.”
فلسطینیان د پرلهپسې بریدونو او قحطۍ د جدي ګواښ له امله له سخت بشري ناورین سره مخ دي.
تر پرون سېشنبې پورې په ۲۴ ساعتونو کې د لوږې له امله ۱۳ فلسطینیانو ژوند بایللی. په غزه کې د اسرائیلي یرغلګرو د جګړې له پیل راهیسې یوازې د لوږې له امله ۳۶۱ فلسطینیان شهیدان شوي دي. په دې کې ۸۳ وروسته له هغه شهیدان شوي، چې د ملګرو ملتونو یوې ملاتړې ادارې د اګسټ پر ۲۲مه د لومړي ځل لپاره په غزه کې قحطي تایید کړه.
د ۲۰۲۳ د اکټوبر میاشتې راهیسې په غزه کې د اسرائیلي یرغلګرو د بریدونو له امله لږ تر لږه ۶۳ زره او ۶۳۳ فلسطینیان شهیدان او ۱۶۰ زره او ۹۱۴ نور ټپيان شوي دي.