د کورنیو چارو وزارت لومړي مرستیال مولوي محمد نبي عمري د افغانستان لپاره د ملګرو ملتونو د ځانګړي همغږي کوونکي استازي له مشاور سره لیدنه کړې.
ځانګړي همغږي کوونکي مشاور اندریو د ملګرو ملتونو په اډانه کې د افغانستان په اړه د موجوده هېوادونو د استازو په نظرونو او د افغانستان له حکومت سره په پوره همغږۍ د هېوادونو د ټینګار معلومات له لومړي مرستیال سره شریک کړي.
د کورنیو چارو وزارت لومړي مرستیال نوموړو ته د ښه راغلاست تر څنګ ویلي، د اسلامي امارت ځواکونه په هر ډول شرایطو کې د هېوادوالو سر او مال خوندي کولو ته ژمن دي.
مولوي محمد نبي عمري د غرب منفي تبلیغاتو ته په اشارې سره ویلي، هر څوک چې غواړي د افغانستان له حالت څخه خبر شي باید راشي او دلته حالت له نیږدې وڅاري.
لومړي مرستیال دغه راز د ټولې نړی سره پر ښه او مثبت تعامل ټینګار کړی او له دوی یې هم د متقابلې همکارۍ او باور غوښتنه کړې.
راغلي پلاوي د کورنیو چارو وزارت له کړنو خوښي ښودلې او د هر راز همکاریو ډاډ یې څرګند کړی.