د افغانستان اسلامي امارت د زعیم عالیقدر امیرالمؤمنين شیخ الحدیث مولوي هبة الله اخندزاده حفظه الله د ځانګړي هدایت له مخې د اسلامي امارت د ریيس الوزرا ملا محمد حسن اخوند په مشرۍ د اړونده وزارتونو له وزيرانو سره غونډه شوې.
په غونډه کې په ګاونډیو هېوادونو کې د افغان مهاجرو پر اوسني وضعيت بحث شوی او د ترلاسه شویو معلوماتو او راپورونو په رڼا کې د جاري ستونزو پر حللارو تفصيلي خبرې شوي.
هېواد ته د راستنېدونکو کډوالو ستونزو ته د پر وخت رسېدو او د اړونده ادارو د چارو د ښه تنظيم په موخه یو کمېسيون جوړ شوی.
د یاد کمېسیون د کړنو د انسجام او شفافیت په موخه د ریاست الوزرا د اداري مرستيال مولوي عبد السلام حنفي په مشرۍ یوې کمېټې ته دنده سپارل شوې، چې یاد کمېسيون ته په عاجله توګه داسې طرز العمل جوړ کړي، چې له مخې یې د اړونده ادارو چارې په ښه توګه تنظيم او د هغوی ترمنځ د لا زیاتې همکارۍ او همغږۍ روحیه او فضا رامنځته شي.