د افغانستان اسلامي امارت د ریاست الوزرا سیاسي مرستیال مولوي عبدالکبیر په تېره اداره کې د حج او اوقافو وزیر محمد صدیق چکري، د اریانا نیوز او یو شمېر نورو قومي مشرانو سره بېلابېلې لیدنې کړي.
محمد صدیق چکري په سیاسي او اقتصادي برخو کې د اسلامي امارت د وروستیو اقداماتو یادونه کړې او ويلي يي دي؛ له څو لسیزو وروسته افغانانو ته ښه فرصتونه په لاس ورغلي، چې باید اغېزمنه ګټه ترې واخیستل شي.
نوموړي زیاته کړې؛ اسلامي نظام د ټولو افغانانو غوښتنه وه او په دې نظام کې زورواکي، نا انډولي او توپیري چلندونه له منځه تللي دي.
د ریاست الوزرا سیاسي مرستیال ویلي؛ اسلامي امارت د ټولو افغانانو ګډ کور دی او هر افغان د دې حق لري، چې خپل نظریات او مشورې د نظام له مسولینو سره شریکې کړي.
نوموړي زیاته کړې؛ د حکومتي ادارو دروازې د ټولو پر مخ پرانستې دي او چارواکي ځان د خلکو د ستونزو حل لپاره مسؤول بولي.
مولوي عبدالکبیر د اریانا نیوز رییس سره په هېواد کې د خصوصي رسنیو د وضعیت په اړه خبرې کړي.
د اریانا نیوز رییس ویلي؛ خصوصي رسنيو د خپلو اصولو له مخې د ملت او حکومت ترمنځ اړیکې ساتلي او همداراز هڅه کوي د افغانستان رښتینی انځور له نړۍ سره شریک شي.
د نوموړي په وینا؛ د رسنیو یو لړ ستونزې حل شوي او تمه ده، چې په دې برخه کې لا ډېر کار وشي.
د ریاست الوزرا سیاسي مرستیال په افغانستان کې د حکومتي رسنیو ترڅنګ د خصوصي رسنیو فعالیت مهم بللی او ویلي يي دي؛ اسلامي امارت د اسلامي اصولو په رڼا کې د بیان ازادۍ ته ژمن دی او په دې برخه کې به تر خپلې وسې شخصي رسنیو ته اسانتیاوې رامنځته او ستونزې يې حل کړي.