د کډوالو لپاره د ملګرو ملتونو عالي کمشنرۍ، د اکمالاتو او نړیوال خوندیتوب مشرې شوکو شیموزاوا او ورسره مل پلاوي د کډوالو او راستنېدونکو چارو له سرپرست وزیر خلیل الرحمن حقاني سره لیدنه کړې.
آغلې شیموزاوا ویلي؛ مونږ په پاکستان کې د کورنیو او بهرنیو سفیرانو او وزارتونو سره ناستې وکړې، د کډوالو ستونزې او مشکلات مو ورسره شریک کړي او غوښتنه مو کړې، چې د کډوالو کارتونه تمدید او ورسره په چلند کې له نرمښت کار واخستل شي.
د کډوالو چارو سرپرست وزیر ویلي؛ په تېر یوه کال کې له یو میلیون زیات کډوال هېواد ته راستانه شوي او د خدای په مرسته اسلامي امارت توانېدلی، چې ټول په ابرو او عزت سره خپلو سیمو ته ورسوي او لازمې مرستې ورته برابرې کړي.
خلیل الرحمن حقاني زیاته کړې؛ که نړیوالې ادارې خپلې مرستې په سمه توګه ورسوي، هیڅوک به بې سرپناه او بې سرنوشته پاتې نشي
نوموړي په کارونو کې په همغږۍ او تفاهم ټینګار کړې او کړنې باید د اسلامي امارت له اصولو او مقرراتو سره سمې ترسره شي.
مالي او اداري مرستیال محمد ارسلاح خروټي ویلي؛ دا چې له کډوالو سره د پاکستان حکومت له لورې بې عدالتي وشوه، دلته باید دوی سره نا انصافي ونشي او ټول راستانه شوي، ثبت او غیر راجستر کډوال یو ډول حقوق ترلاسه کړي.