د اطلاعاتو او کلتور وزارت له لوري کندهار کې د زرغونې انا مقبرې د بیا رغونې او اساسي ترمیم چارې پيل شوې.
په دې تړاو جوړو شویو مراسمو کې د اطلاعاتو او کلتور سرپرست وزير ملا خير الله خيرخواه او ګڼو ځایو مسولینو او چارواکو ګډون کړی وو.
ملا خیرالله خیرخواه ویلي: “د هېواد په کچه د ځينو تاریخي ابداتو حالت ښه نه وو، د زرغونې انا مقبرې ترميماتي کارونه هم درېدلي وو، چي نن یې بيرته د بیا رغونې چارې پيل شوې.”
نوموړي زیاته کړې؛ د عاليقدر اميرالمؤمنين حفظه الله د حکم سره سم هغه تاريخي ابدې رغول کېږي، چي حالت یې سم نه دئ او زيات ترمیم ته اړتیا لري.
ښاغلي خیرخواه ټینګار کړی، چې د تاريخي ابداتو سیمو د غصب مخنیوي په برخه کې جدي اقدام کوو.
د زرغونې انا مقبرې د بیارغونې پروژې چارې به د اسلامي امارت له بودیجې د ۱۱ میلیونه افغانیو په لګښت په درېیو میاشتو کې بشپړې شي.
د يادولو وړ ده، چي څو ورځې وړاندې د ميرويس نيکه او احمدشاه بابا د مقبرو بیارغونې چارې پای ته ورسېدې.