د ریاست الوزرا د دفتر لوی رییس ډاکټر ملا عبدالواسع د دفتر مرستیالانو او د امارت یو شمېر نورو مسولینو په شتون کې د منابعو او ادارې نوي مرستیال مفتي سید احمد مستقیم معریفي کړ.
د ریاست الوزرا د دفتر لوی رییس تغییر او تبدیل او د مسولیت سپارل د اسلامي نظام ځانګړی اصل بللی، چې موخه یې د خدای (ج) رضا، اسلامي نظام، وطن او خلکو ته خدمت دی.
ډاکټر ملا عبدالواسع ویلي؛ په نورو نظامونو کې څوکۍ ته د مقام او منسب خطاب کېږي، خو په اسلامي امارت کې دا چاره فقط امانت او دروند مسولیت دی، چې د اسلامي امارت د رهبري له لوري وړ کسانو ته سپارل کېږي.
نوموړي په خپلو خبرو کې د ریاست الوزرا مقام د دفتر لوی ریاست د منابعو او ادارې د مخکېني مرستیال مولوي عبدالعزیز جاوید کړنې ستایلي او مفتي سید احمد مستقیم ته یې په ورسپارل شویو چارو کې د بریالیتوب دعا کړې.
وروسته د ریاست الوزرا د دفتر لوی ریاست د بشري سرچینو رییس مولوي محمد داوود محمدي د رییس الوزرا د لزوم دید اړوند د چارو د لا ښه والي او تنظیم په موخه په مافوق بست کې د کلیو او پراختیا وزارت مخکېني مرستیال او د ریاست الوزرا د دفتر لوی ریاست د منابعو او ادارې اوسني مرستیال مفتي سیداحمد مستقیم د مقررۍ په اړه د رییس الوزرا ملا محمد حسن اخوند د ۱۴۰۲ کال د سلواغې د ۲ نیټې ۳۴۶۶ ګڼه حکم ولوست.
د غونډې په پای کې د ریاست الوزرا د دفتر لوی ریاست د منابعو او ادارې مرستیال مفتي سیداحمد مستقیم په خپلو خبرو کې د چارو د لاښه والي په موخه له اړوندو ادارو سره پر همغږۍ او ګډ کار ټینګار کړی او ویلي يي دي؛ د بریا راز نه ستړې کېدونکې هلې ځلې، کلک هوډ او اراده ده، چې موږ به هم پر دغه هوډ خپلې چارې مخته وړو.
نوموړي زیاته کړې؛ زموږ موخه د افغانستان کړیدلي ولس ته په اخلاص خدمت دی، ترڅو متعال خدای او ولس راڅخه خوشحال شي.