د افغانستان بانک د سرپرست رییس هدایت الله بدري په مشرۍ د الکترونیکي بانکوالۍ پراختیا په موخه غونډه شوې.
په دغه غونډه کې د افغانستان بانک سرپرست رییس د برېښنایي بانکوالۍ پر ارزښت خبرې کړي او دا بانکوالي یې د ننني عصر غوښتنه یاده کړې.
نوموړي د افغانستان بانک د اړوندو برخو له کارکوونکو غوښتي، چې د دې بانکوالۍ د پراختیا او پرمختګ لپاره په ټول توان هڅه وکړي او له دې لارې درنو هېوادوالو ته د غوره خدمتونو د وړاندې کولو زمینه برابره کړي.
د افغانستان بانک د اداینو سیستم (APS) لوی آمریت کارکوونکو په یادې شوې برخه کې د رامنځته شوو پرمختګونو په اړه معلوماتي پریزنټیشن شریک کړی او د ګډونوالو تر منځ د الکترونیکي بانکوالۍ د پراختیا په موخه خبرې شوي دي.
د افغانستان بانک د پالیسۍ ستر سلاکار معراج محمد معراج د الکترونیکي بانکوالۍ په برخه کې را منځته شوي پرمختګونه ستایلي او په دې برخه کې د پرمختګ لپاره یې د اړوندو ادارو تر منځ په لا ډېره همغږۍ او د تخنیکي ناستو په زیاتوالي ټینګار کړی.