د اقتصادي کمېسیون د تخنیکي کمېټې په نوبتي غونډه کې چې د روان لمریز کال د سلواغې میاشتې په ۱۶مه نېټه په مرمرینه ماڼۍ کې جوړه شوې وه له اجنډا سره سم د یو شمېر اقتصادي موضوعاتو په اړه بحث شوی.
یادې غونډې ته د کمال خان بند د دویم فاز د امکان سنجۍ د لومړنیو مطالعاتو بشپړ راپور وړاندې شوی.
په غونډه کې تر هر اړخیز بحث وروسته د اوبو او انرژۍ او کرنې، اوبولګولو او مالدارۍ وزارتونو او د ملي پراختیا شرکت له استازو څخه جوړې شوې کمېټې ته دنده سپارل شوې، څو د ترسره شوو مطالعاتو په پام کې نیولو سره د امکان سنجۍ دقیق تخنیکي مطالعات ترسره او راپور یې دې د اقتصادي کمېسیون تخنیکي کمېټې ته وړاندې کړي.
همدارنګه د اقتصادي کمېسیون د تخنیکي کمېټې له لوري د هرات – خواف د اوسپنې پټلۍ د څلورمې قطعې پروژې د لومړي فاز د جوړولو پر مالي تمویل هم خبرې شوي.
د موضوع تر هر اړخیزې ارزونې وروسته پرېکړه شوې، چې مالیې وزارت دې د یادې پروژې لپاره د بودیجې ترلاسه کولو په موخه د افغانستان اسلامي امارت د مشرتابه عالي مقام ته ځانګړی وړاندیز وکړي.
دغه پرېکړه د نهايي تصمیم نیونې په موخه اقتصادي کمېسیون ته وړاندې شوې.