د کورنیو چارو سرپرست وزير خليفه سراج الدين حقاني د پکتیا مرکز ګردېز او وزې ولسوالۍ کې جوړو شوو ولسي ناستو کې ګډون کړی.
د پکتيا قومي مشرانو د هېواد شمالي سيمو ته د سرپرست وزیر سفر ستایلی او د ګڼو بنسټي پروژو پلي کول يې د هېواد رغونې په برخه کې د اسلامي امارت د هڅو ښه بېلګه بللې ده.
دوی له ولس سره د امنيتي سرتېرو چلند اصولي بللی او له اداري فساد سره د مبارزې په برخه کې يې د اسلامي امارت هلې ځلې ستایلي دي.
د کورنیو چارو سرپرست وزير ویلي؛ افغانستان د ابادۍ نوي دور ته داخل شوی، د هېواد د فزيکي رغونې ترڅنګ د وګړو فکري او قلبي جوړښت هم اړين دی.
خليفه سراج الدين حقاني زیاته کړې؛ د نړۍ ټولو هېوادونو له دولتي، نظامي او اقتصادي ځواکونو او همکارۍ سره سره په تېرو ۲۰ کلونو کې په هیڅ کلي او ولسوالۍ کې سوله نه ده ټینګه شوې، د نن ورځې سوله او امنیت د افغانستان د داخلي او ملي مشروعیت ستر ثبوت دی.
ښاغلي جقاني ویلي؛ د یو داسې هېواد وګړي یو، چي د اسلام په مبارک دین، ګډو ارزښتونو او د خپلواک افغانستان په مشترکات سره تړلي یو، د پردیو یرغل زموږ په مشترکو ارزښتو زموږ اتحاد لا غښتلی کړی.
نوموړي ویلي؛ په ګډه مو ستر دښمنان مات کړي، اوس به په ګډه وطن هم ابادوو.
د سرپرست وزیر په وینا؛ افغانان یو خاکساره ملت دی، له چا سره زورزیاتی نه کوي، خو د چا یرغل ته هم نه تسلیمېږي.
خليفه سراج الدين حقاني د دې سفر پر مهال د وزې ولسوالۍ په علي احمد خېلو سيمه کې جوړ شوی جامع جومات هم پرانېست.