د چاپېریال ساتنې ملي ادارې عمومي رییس حافظ عزیزالرحمن، مالي او اداري مرستیال مولوي عبدالسلام حقاني او د دې ادارې د مختلفو څانګو رییسانو ننګرهار پوهنتون کې د اقلیم بدلون نړیوال کنفرانس په لړ کې له اقلیمي بدلون سره د مبارزې، سازښت او پالیسۍ جوړولو په تړاو د بهرنیو استادانو او متخصصینو، د ننګرهار پوهنتون علمي مرستیال، استادانو او متخصصینو سره ځانګړې ناسته کړې.
په دې ناسته کې د چاپېریال ساتنې ملي ادارې عمومي ریيس له خوا د افغانستان د چاپېریالي وضعیت، د اقلیمي بدلون د ناوړه اغیزو، چاپېریال ساتنې او ککړتیا د مخنیوي په برخه کې له بهرنیو او داخلي استادانو او متخصصینو سره هر اړخیز معلومات شریک شوي.
د بهرنیو استادانو او متخصصینو لخوا د اقلیمي بدلون سره د مبارزې او سازښت او همدا راز د خوندي چاپېریال د رامنځته کولو په تړاو لازمې طرحې او نظرونه وړاندې شوي، چې د پالیسو په جوړولو کې به ترې استفاده وشي.
د نړۍ د بیلابیلو هېوادونو څخه راغلو استادانو د دې کنفرانس دایرول ارزښتمن بللی او ژمنه یې کړې، چې موږ به د افغانستان د خلکو ږغ تر نړیوالو ورسوو.
یادو استادانو ویلي؛ دا مهال په افغانستان کي بشپړ امنیت تامین شوی، هغه پروژې چي دا مهال د چاپیریال ساتني او اقلیمي بدلون په برخه کې ځنډیدلې وې باید ژر تر ژره پیل شي او زیاته کړې یې ده، چې موږ به ستاسو د ږغ په بدرګه کولو کې پوره هڅه او کوښښونه وکړو.
د چاپیریال ساتنې ملي ادارې د اقلیم بدلون سره د مبارزې په برخه کې د بهرنیو او داخلي متخصصینو طرحې او نظرونه مهم ګڼلي، چې په راتلونکي کې به په پالیسۍ جوړولو کې په عملي ډول پلي شي.