په افغانستان کې د سره صلیب نړيوالې کميټې مشرې کاتارینا ریټز د بهرنیو چارو وزارت له سیاسي مرستیال شېرمحمد عباس ستانکزي سره لیدنه کړې.
په دې لیدنه کې ریټز په افغانستان کې د سره صلیب نړيوالې کميټې له اوږدې مخینې ترڅنګ د ماین پاکۍ، خوراکي توکو، درملو، اوبو رسونې او روغتیایي خدمتونو څخه یادونه کړې او له یادو خدمتونو یې لا هم ملاتړ څرګند کړی.
نوموړې زیاته کړې؛ دوی اوسمهال هم د ظرفیت لوړونې او روزنې به برخه کې یو لړ پروژې تر لاس لاندې لري، چې د حکومت په همغږۍ یې مخته وړي.
د بهرنیو چارو وزارت سیاسي مرستیال د سره صلیب نړیوالې کمیټې مرستې اوږد مهاله او تاریخي بللې او په سختو شرایطو کې یې له افغانانو سره د دوی له هر اړخیزو مرستو او همکاریو مننه کړې.
نوموړي په افغانستان کې د سره صلیب نړيوالې کميټې د بشري فعالیتونو په اړه د بهرنیو چارو وزارت په استازیتوب د بشپړې همکارۍ ډاډ ورکړی.