د ریاستالوزرا اقتصادي مرستیال ملا عبدالغني برادر اخوند له لوري د روان ۱۴۰۳ لمریز کال د ثور میاشتې په اتمه نېټه د خیرخانې کوتل سړک دوهم لاټ، له شهید څلورلارې تر قصبې پورې د غځېدلي سړک لومړۍ برخه او د هوايي ډګر له څلورلارې بیا تر ګمرک پورې د غځیدلي سړک جوړولو پروژې پرانیستل شوې.
ملا عبدالغني برادر اخوند د یادو پروژو د پرانیستو په مراسمو کې ویلي؛ کابل ښاروالي د ښار د ښکلا او منظموالي په موخه ډېرې هڅې کوي، چې د پخوا په پرتله د ښار بڼه منظمه شوې، موږ یې ټولې ترسره شوې هڅې ستایو او پر هېوادوالو غږ کوو؛ چې د عامالمنفعه پروژو په ساتلو کې له حکومت سره همکاري وکړي.
د ریاستالوزرا اقتصادي مرستیال د کابل ښاروالۍ مسولینو ته سپارښتنه کړې، څو یادې پروژې په ټاکلي وخت او ښه کیفیت سره بشپړې کړي.
د خیرخانې کوتل سړک دوهم لاټ دوه زره او ۵۲۰ متره اوږدوالی او ۶۰ متره پلنوالی لري، چې چارې به یې د ۳۶۴ میلیون افغانیو په لګښت سره په ۲۰ میاشتو کې بشپړه او ګټې اخیستنې ته وسپارل شي.
له شهید څلورلارې تر قصبې پورې د غځېدلي سړک د لومړۍ برخې پروژه یو زر او ۸۹۰ متره اوږدوالی او ۴۵ متره پلنوالی لري، چې ټولټال پرې ۱۷۵ میلیونه افغانۍ لګښت او په یو کال کې ګټې اخیستنې ته سپارل کېږي.
د هوايي ډګر له څلورلارې بیا تر ګمرک پورې د غځیدلي سړک پروژه دوه زره او ۷۹۴ متره اوږدوالی او ۶۰ متره پلنوالی لري، چې ۴۰۷ میلیونه افغانۍ لګښت پرې راځي او ټاکل شوې چې په ۲۰ میاشتو کې به یې چارې بشپړې او ګټې اخیستنې ته به وسپارل شي.
دغه پروژې ویالې، پلې لارې، ګلدانونه، برېښنا، تمځایونه، د سړک د سر خط کول، د ترافیکي نښو نصبول او د یوه معیاري سړک نورې برخې هم لري، چې مالي لګښت یې د کابل ښاروالۍ له لوري ورکول کېږي.