د بهرنیو چارو وزارت وایي، هېوادوالو ته د اسانتیاوو برابرولو په موخه یې د ولایتونو تر منځ د اسنادو د تایید خدمتونه پیل کړي.
دغه وزارت وايي، له دې وروسته خلک کولای شي، چې نورو ولایتونو ته له تګ څخه پرته په خپل ولایت کې د افغان پوست استازولیو له لارې د تایید لپاره کابل او په ولایتونو کې شپږو نورو استازولیو ته ولېږي.
د یادونې وړ ده، چې بهرنیو چارو وزارت دا مهال په کندهار، هرات، بلخ، کندوز، ننګرهار او پکتیا کې استازولۍ لري.
د چین د بهرنیو چارو وزیر وانګ یي اعلان کړی، چې هېواد یې د تاجیکستان سره په ګډه افغانستان کې د سولې، ثبات او بیارغونې پياوړتیا په برخه کې خپلې همکارۍ ته دوام ورکوي.
د چین د بهرنیو چارو وزیر دغه څرګندونې په دوشنبې ښار کې د خپل تاجیکستاني سیال سراجالدین مهرالدین سره د لیدنې پرمهال کړې دي.
د کډوالو او بېرته راستنېدونکو چارو وزیر مولوي عبدالکبیر د بدخشان د جهادي مدرسې له مهتمم شیخ عبدالحفیظ سره لیدنه وکړه.
د بدخشان د جهادي مدرسې مهتمم شیخ عبدالحفیظ، له علماوو او ولس سره د کډوالو او راستنېدونکو چارو وزارت له همکاریو او لیدنو په خوښۍ وویل، چې د خلکو او حکومت تر منځ نږدې اړیکې د اسلامي نظام د قوت سبب شوې دي.
شیخ عبدالحفیظ د جهادي مدرسو لاسته راوړنو ته په اشارې سره زیاته کړه، چې په جهادي مدرسو کې زدهکړو ته د ځوانانو لېوالتیا ډېره شوې او هر کال د بدخشان د جهادي مدرسې د طالبانو شمېر ډېرېږي.
دغهراز ښاغلي مهتمم د خبرو پر دوام د کډوالو اړوند ځينې وړانديزونه او نظرونه له ښاغلي وزیر سره شریک کړل.
د کډوالو او بېرته راستنېدونکو د بدخشان د جهادي مدرسې مهتمم ته ښه راغلاست وویل او په تعلیمي برخه کې یې د علماوو د هڅو ستاینه وکړه.
مولوي عبدالکبیر د جهادي مدرسو فعالیت ګټور یاد کړ او ويې ویل، چې د اسلامي امارت تر بریا وروسته افغان ځوانان بهر ته د دیني زده کړو لپاره سفر کولو ته اړ نه دي، ځکه په هېواد کې تر لوړې کچې دیني زده کړو ته زمینه برابره شوې ده.
د نوموړي په وینا، چې علمي بنسټونه باید، د خپلو عادي چارو تر څنګ، د اسلامي امارت پیغام او د ابادۍ پروګرامونه له ولس سره شریکې کړي او د ټولنې په وده کې ونډه واخلي.
د اطلاعاتو او کلتور وزارت د عامه کتابتون رییس دوکتور رفیع الله صمیم ترکیې ته د سفر په ترڅ کې د ترکیې د (ملت) کتابتون له رییس ایهان توغلو سره لیدنه کړې.
ښاغلي ایهان توغلو د عامه کتابتونونو رییس دوکتور رفیع الله صمیم ته د ښه راغلاست ترڅنګ، د ملت کتابتون اړوند معلومات ورکړي.
دوکتور رفیع الله صمیم د افغانستان او ترکیې هېواد تاریخي اړیکو ته په اشارې ترکیه د افغانستان دوست هېواد یاد کړی او افغانستان کې د عامه کتابتونونو په وضعیت یې هراړخیزې خبرې کړې دي.
ښاغلي صمیم ويلي، افغانستان کې عامه کتابتونونه مخ پر ودې دي او ورځ تر بلې د مطالعې کلتور پیاوړی کیږي.
د اطلاعاتو او کلتور وزارت وایي، دواړو لوریو د عامه کتابتونونو د کارکوونکو پر روزلو او ډیجیټل کتابتونونو پر فعالولو هوکړه کړې.
د دغه وزارت په وینا، د ترکیې د ملت کتابتون رییس ژمنه کړې، چې د افغانستان له عامه کتابتون سره د ترکیې د تاریخ، جغرافیې او شاعرانو په اړه لیکل شوي د ۱۵۰ جلده کتابونو مرسته وکړي.
د صنعت او سوداګرۍ وزیر نورالدین عزیزي د هند د درملو صادراتو د پراختیا شورا له غړو سره په لیدنه کې د درملو واردولو او د دواړو هېوادونو د درملو سوداګرۍ بهیر کې د شته ستونزو د حل په اړه خبرې کړې دي.
په دې لیدنه کې هندي لوري د ګډې پانګونې او په افغانستان کې د درملو تولیدي کارخونو جوړولو په برخه کې چمتووالی څرګند کړی.
ورته مهال د صنعت او سوداګرۍ وزیر د هند د درملو له معتبرو شرکتونو د اسلامي امارت د هر اړخیز ملاتړ ډاډ څرګند کړی.
پر غزې تړانګه د اسرائیلي رژیم د تازه بریدونو له امله د ماشومانو په ګډون لږترلږه ۲۴ فلسطینیان شهیدان شوي دي.
الجزیرې خبري شبکې راپور ورکړی، چې په دغو بریدونو کې لږترلږه ۷۸ تنه نور ټپیان شوي دي.
د یادې شبکې د معلوماتو له مخې، په غزې تړانګه کې د صهیونیستي رژیم د اوربند راپدېخوا تر اوسه لږترلږه ۳۱۲ فلسطینیان شهیدان شوي او نږدې ۸۰۰ نور ټپیان شوي دي.
د صهیونیستي رژیم د نسلوژنې جګړې له پیل راهیسې تر دې دمه نږدې ۶۹ زره او ۵۴۶ فلسطینیان شهیدان شوي او له ۱۷۰ زره او ۸۳۳ څخه ډېر نور ټپیان شوي دي.
د افغانستان اسلامي امارت د ارشاد، حج او اوقافو وزیر شیخ نورمحمد ثاقب د یو پلاوي په مشرۍ هلمند ولایت ته سفر کړی دی.
ښاغلي ثاقب د دغه سفر په ترڅ کې د نهر سراج ولسوالۍ هغه ودانۍ له نږدې وکتله چې د قرآن کریم د زړو نسخو د ساتنې لپاره جوړېږي.
په دې ودانۍ کې به د قرآن کریم زړې نسخې او نور مقدس اوراق په خوندي ډول راټولېږي او ساتل کېږي، څو په ښه ډول خوندي او له بشپړ درناوي څخه برخمن شي.
د یادونې وړه ده، چې دغه ودانۍ د عالیقدر امیرالمؤمنین حفظهالله د ځانګړي هدایت له مخې جوړیږي او له بشپړېدو وروسته به د ارشاد، حج او اوقافو وزارت ته وسپارل شي او د سرپرستۍ چارې به یې د هلمند د ارشاد، حج او اوقافو ریاست پر غاړه وي.
د بلخ ولایت د ځایي مسوولینو او سوداګرۍ خونې په هڅو تېره ورځ اوزبیکستان ته د انارو، مڼو او وچو توتو صادارت پیل شول.
د اسلامي امارت مرستیال ویاند ملا حمدالله فطرت پر خپله ایکس پاڼه لیکلي، په لومړي پړاو کې له یاد ولایت څخه اوزبیکستان او له هغه ځایه منځنۍ اسیا بازارونو ته د دوه نیم لکه ډالرو په ارزښت ۵۰۰ ټنه وچه او تازه مېوه صادره شوه.
د یادونې وړ ده، چې اوس مهال د افغانستان تازه او وچې میوې د حیرتان بندر له لارې اوزبیکستان او منځني اسیا ته صادریږي او دا لړۍ به نوره هم داوم وکړي.
د اسلامي امارت د بهرنيو چارو وزیر مولوي امیرخان متقي، په کابل کې د جاپان له نوي سفير ښاغلي ماساموتو کينيچي سره تعارفي ليدنه وکړه.
د بهرنیو چارو وزير د جاپان سفير ته په نوي ماموريت کې د بريالیتوب هیله څرګنده کړه او زیاته یې کړه، جاپان د نړۍ له پرمختللیو هېوادونو څخه دی، افغانستان له جاپان سره تاریخي اړيکې لري او اسلامي امارت له یاد هېواد سره د مثبتو سیاسي او اقتصادي اړیکو غوښتونکی دی.
همدارنګه د جاپان سفير ښاغلي ماساموتو کينيچي په افغانستان کې د سرتاسري امنيت، د مخدره توکو په وړاندې مبارزې او په ګڼو برخو کې د پرمختګونو ستاينه وکړه او ویې ویل، د خپل ماموريت په وخت کې به هڅه وکړم چې د دواړو هېوادونو تر منځ اړیکې پياوړې شي او له افغانستان سره په بېلابېلو برخو کې همکارۍ زیاتې شي.
