ټاپي د افغانستان لپاره غوره او حیاتي پروژه ده، چې د عملي چارو په پیلېدو سره به د هېواد د ابادۍ او ښېرازۍ پر لور یو ستر ګام واخیستل شي.

اسلامي امارت د هېواد ستراتیژیک موقعیت ته په کتو هڅه کوي، چې له انرژي څخه غني مرکزي اسیا د انرژۍ له کمبود سره مخ سویلي اسیا سره ونښلوي.

د انرژۍ دغه پروژه چې د افغانستان له لارې تېریږي د ټاپي پروژه ده، چې افغانستان کې به یې عملي چارې ډېر ژر پیل شي.

د ټاپي نل‌لیکه شاوخوا یو زر او ۸۲۱ کلیو متره اوږدوالی لري، چې ۸۲۱ کیلو متره یې د افغانستان له خاورې څخه تېریږي.

یاده نل‌لیکه په کلني ډول د ۳۳ میلیارده متر مکعب ګاز د لېږد ظرفیت لري او د ترانزیټ فیس (حق‌العبور) له درکه یې افغانستان ته ۴۵۰ میلیونه ډالر کلني عواید اټکل شوي دي.

څرنګه چې د ټاپي نل‌لیکه د افغانستان له دوو ممو ولایتونو (هرات او کندهار) څخه تېرېږي، دا ولایتونه به له رزانه او پایداره انرژي څخه برخمن شي.

یاده پروژه له ترکمنستان څخه پيل، د افغانستان له خاورې څخه په تېرېدو به لومړی پاکستان او په پای کې هند ته ورسېږي.

د دې نل‌لیکې د رغولو او وروسته د استفادې پر مهال د حفظ او مراقبت او امنیت په برخو کې زرګونه کسانو ته په مستقیم او غیرې مستقیم ډول د کار زمینه برابرېږي.

دغه‌راز افغانستان له دې ګاز څخه په ګټه اخیستلو سلګونه میګاواټه برېښنا هم تولیدولای شي.

د دې سترې اقتصادي پروژې په پیلېدو سره به مو هېواد پر ځان بسیا شي، هېوادوالو ته به د کار زمینه برابره او ډېر ځوانان به د بهرنیو هېوادونو له مسافرت څخه وژغورل شي. د دې تر څنګ ټاپي د هېواد لپاره له لاسته راوړنو یوه ډکه پروژه ګڼل کېږي.

د افغانستان اسلامي امارت رهبرۍ د ټاپي پروژې د پلې کولو په موخه ګړندۍ هڅې پیل کړې، چې ډېر ژر به یې د افغانستان په خاوره کې عملي چارې پیل شي.

د دې پروژې په پلي کېدو سره به اقتصادي ودې او پرمختګ ته لاره اواره شي او هېواد به ګړندی پرمختګ ورسره وکړي.

د یادونې وړ ده، چې افغانستان د منځنۍ او سویلي اسیا ترمنځ د ترانزیټ او انرژۍ د لېږد لپاره تر ټولو نږدې او امن لار ده او اسلامي امارت تل هڅه کړې، چې له دې لارې څخه منځنۍ او سویلي اسیا ونښلوي او افغانستان د سوداګرۍ په مرکز بدل کړي.

د ټاپي پروژې لنډه تاریخچه!

د ۲۰۰۲ کال په ډسمبر میاشت کې د افغانستان، ترکمنستان او پاکستان د حکومتونو مشران د ترکمنستان پلازمېنه عشق اباد کې سره جرګه شول او د یو بین الحکومتي درې اړخیز تړون په لاسلیکولو سره یې د پروژې لپاره نوی بنسټ کېښود.

دا پروژه په دې وخت کې درې اړخیزه وه، یانې ټاپ (ترکمنستان-افغانستان-پاکستان) نومېده، خو د ۲۰۱۰ کال په ډسمبر کې د یو بل څلور اړخیز بین الحکومتي تړون په لاسلیکېدو سره هند هم رسماً له ټاپ سره یو ځای شو او دا پروژه له ټاپ څخه ټاپي شوه.

په ۲۰۱۳ کال کې افغانستان، ترکمنستان، پاکستان او هندوستان خپل د ګازو دولتي شرکتونه معرفي کړل، چې هر یو د خپل دولت په استازیتوب د پروژې تخنیکي چارې مدیریت او پر مخ یوسي.

د افغانستان په استازیتوب افغان ګاز تصدي، د ترکمنستان په استازیتوب ترکمن ګاز، د پاکستان په استازیتوب انټرسټېټ ګاز پرایوېټ لمېټد (ISGS) او د هند په استازیتوب ګېل لمېټډ (GAIL) پروژې ته معرفي شول.

څلور واړو هېوادونو پرېکړه وکړه، چې د پروژې د تطبیق لپاره به یو کنسرشیوم جوړوي. ترکمن ګاز ته د ۸۵٪ ونډې په ورکولو سره د کنسرشیوم د رهبرۍ مسولیت وسپارل شو او پاتې ۱۵٪ ونډه پر افغان ګاز، انټرسټېټ ګاز سیستم او ګېل باندې ووېشل شوه، چې هر یو په پروژه کې د ۵ سلنه درلودونکی شو.

په ۲۰۱۵ کال کې د ټاپي کمپنۍ لمېټډ (TAPI Company limited) په نامه د متحده عربي اماراتو په دوبۍ ښار کې د ټاپي شرکت تاسیس شو، چې د پروژې د ډیزاین، تمویل او تطبیق چارې پرمخ یوسي. اوس‌مهال د پروژې د مدیریت، تطبیق او تمویل چارې د همدې شرکت پر غاړه دي.

د پروژې تخنیکي ځانګړنې:

– د پایپلاین اوږدوالی: د ترکمنستان له ګالکنېش ګازي ساحې څخه د پاکستان او هند تر سرحدي نقطې فاضیلکا پورې ۱۸۲۱ کیلومتره.

– د ګازو د لېږد کلنی ظرفیت: ۳۳ میلیارده مترمکعب.

– په افغانستان کې د پایپلاین اوږدوالی: ۸۲۱ کیلومتره.

– د پروژې ټول تخمیني لګښت: د ۶ او ۷ میلیارده امریکايي ډالرو ترمنځ.

– د پروژې عمر: ۳۰ الی ۵۰ کاله.

– د پایپلاین قطر: ۵۶ اینچه. د ټرانزیټ فیس (حق العبور) له درکه د افغانستان کلني تخمیني عواید: ۴۰۰ میلیونه ډالر.

د پروژې اقتصادي ګټې:

دا د انرژۍ یوه پروژه ده، نو ښکاره ده چې انرژي نن سبا د اقتصادي ودې لپاره اساسي شرط ګڼل کېږي؛ په ځانګړې توګه د افغانستان لپاره ددې پروژې مستقیمې ګټې په لاندې ډول خلاصه کولی شو:

۱- ټرانزیټ فیس: دا چې پایپلاین د افغانستان له خاورې هند او پاکستان ته تېرېږي، د تېرو شویو تړونونو پربنسټ پاکستان او هند مکلف دي چې افغانستان ته هر کال یو مقدار حق العبور یا ټرانزیټ فیس ورکړي.

که څه هم تر اوسه د افغانستان، هند او پاکستان ترمنځ د تزانزیټ تړون نهايي شوی نه دی، خو په ۲۰۱۲ کال کې د یو ابتدايي توافق او محاسبې پراساس له هر هېواد څخه په کال کې شاوخوا ۲۱۲ میلیونه امریکايي ډالر به د ترانزیټ فیس په نامه اخیستل کېږي.

۲- کارموندنه: د ټاپي پایپلاین د ساختمان او عملیاتو په پړاوونو کې زرګونه کسان پر کار بوختېدای شي.

د ساختمان په مرحله کې به د بشري قوې پر مصرفېدو سربېره ټاپي شرکت مکلف دی، چې د پروژې د اړتیا وړ ټوله ماشینري، توکي او بشري قوه د افغانستان څخه تدارک کړي.

۳- دوامداره انرژۍ ته لاسرسی: دا چې ټاپي پایپلاین د افغانستان له دوو مهمو صنعتي او تجارتي ولایتونو لکه هرات او کندهار څخه تېرېږي، دغه ولایتونه به له ارزانې او پایدارې انرژۍ څخه برخمن شي.

په لومړي سر کې په پام کې ده چې له تورغونډۍ څخه د هرات تر ګذرې پورې ۱۵۲ کیلو متره پایپلاین بشپړ شي، چې په دې فاز کې ټول تمرکز به د هرات صنعتي پارک ته د ګازو پر برابرولو وي. که چېرې د هرات صنعت پارک ته ارزانه او دوامداره ګاز برابر شي، نو صنعت به فوق العاده وده وکړي او ګڼ افغان پانګوال به وهڅول شي چې له بهر څخه خپلې پانګې را ولېږدوي.

د ارشاد، حج او اوقافو وزارت مسولینو نن د سه شنبې په ورځ (۲۰ وږی ۱۴۰۳) د حکومت د اطلاعاتو او رسنیو مرکز کې د امارتي ادارو د یو کلنو لاسته راوړنو د تشریح پروګرام کې د یوه خبري کنفرانس پر مهال، د دغه وزارت د یو کلنو کړنو او لاسته راوړنو راپور له رسنیو سره شریک کړ.

د ارشاد، حج او اوقافو وزارت مسولینو په یاد خبري کنفرانس کې وویل؛ په تېر یوه کال کې د هېواد په یو شمېر ولایتونو او ۲۶۰ نظامي مرکزونو کې د قرآن کریم د تفسیر او ترجمې پروګرامونو له څرنګوالي څخه څارنه شوې ده.

دغه راز سعودي عربستان ته د ۳۰ زره حاجیانو د لېږد لپاره اړینې اسانتیاوې او شرایط برابر شوي او ۶۵۲ تنه جید علما د استادانو په توګه هغه هېواد ته استول شوي دي.

مسولینو زیاته کړه؛ په ګمرکونو کې د ۱۳ جوماتونو او د ولایتونو په مستوفیتونو کې د ۲۵ جوماتونو د جوړولو لپاره لازم تدابیر نیول شوي دي.

همدارنګه، په لوګر ولایت کې د استیناف محکمې اړوند د یوه جومات، په بدخشان ولایت کې د نبوي جومات او عیدګاه جومات، په فاریاب ولایت کې د درې جوماتونو او په بلخ ولایت کې د حاجیانو د مجتمع جوړولو له چارو څخه په دوامداره توګه څارنه شوې ده.

په همدې ډول، په مرکز او ولایتونو کې د جوماتونو د امامانو لپاره د ظرفیت لوړونې د څلورو سیمینارونو جوړول، په ۱۴ ولایتونو کې د ۷۵ جوماتونو سمبالول او د ټرانسپورټ وزارت، اټومي انرژۍ ادارې، سټنډرډ ادارې، د سمنګان ولایت مقام او د فراه ولایت محکمې په مربوطاتو کې د پینځه جوماتونو جوړول؛ په تیر کال کې د وزارت له عمده فعالیتونو څخه دي.

د مسولینو په خبره، د عمرې او زیارت له ۱۳۲ متقاضي شرکتونو سره تړونونه لاسلیک شوي، د عمرې او زیارت متقاضي شرکتونو ته ۴۲ جوازونه ورکړل شوي، سعودي عربستان ته د ۴۴ زره او ۳۰۷ معتمرینو او عمرې متقاضیانو د لېږد لپاره لازمې اسانتیاوې برابرې شوي او د ۴۰ قراردادي شرکتونو له فعالیتونو څخه په دوامداره ډول څارنه شوې ده.

مسئولینو د خپلو خبرو په دوام وویل؛ د بېلابېلو مسایلو په اړه ۳۵۳ فتواګانې صادرې شوي، په ۴۲ مواردو کې د قرآن کريم، تفسيرونو، کتابونو او رسایلو د چاپ د صحت په اړه نظر ورکړل شوي او اووه علمي اثار تالیف او تدوین شوي دي.

همدارنګه نړیوالو سیالیو ته د ممتازو قاریانو د ورپېژندنې په موخه، په ټول هېواد کې د قرآنکریم د حفظ، تجوید او قرائت سیالۍ تر سره شوي، چې په پایله کې یې درې قاریان او یو داور په ایران کې د قرآنکریم د نړیوالو سیالیو ۴۰م پړاو او دوه قاریان په ترکیې کې د قرآنکریم د نړیوالو سیالیو نهم پړاو ته ورپېژندل شوي دي.

د مسولینو په وینا، په تېر کال کې اته زره او ۵۰۸ تنه د دیني علومو له بېلابېلو څانګو، ۸۰ تنه د ائمه تدریب ستاژ له لومړۍ دورې او ۱۵ تنه د قرائت له عالي انسټیټوټ څخه فارغ شوي دي.

مسئولین زیاتوي، چې په غور، کابل، سرپل، کندوز، جوزجان، میدان وردګو او لغمان ولایتونو کې د جوماتونو، مدرسو او هدېرې لپاره ۱۲۷ جریبه ځمکه ثبت شوې ده.

دغه راز د میدان وردګو، غزني، زابل او کندهار په لویه لار کې هم د جوماتونو جوړولو لپاره ۱۸ جریبه ځمکه تثبیت شوې ده.

د وزارت د مسولینو د معلوماتو پر بنسټ، په تېر کال کې د وزارت د رهبرۍ پلاوي په ایران کې د اسلامي مذاهبو د نېږدېوالي په ۲۷ کنفرانس او ​​په ترکیې کې د اسلامي نړۍ د علماوو په مشورتي کنفرانس کې ګډون کړی.

همدارنګه اوزبیکستان ته د سفر تر څنګ یې، د حاجیانو ستونزو ته د رسېدنې په موخه سعودي عربستان ته هم سفر کړی دی.

په لندن کې د افغانستان سفارت اعلان کړی، چې د برېتانیا دولت د رسمي غوښتنې په اساس ټاکل شوې د روان زېږدیز کال د سپټمبر په ۲۷مه دا سفارت په رسمي ډول وتړل شي.

د چارو کارپوهان په دې باور دي، چې ټاکل شوې د اسلامي امارت او یو شمېر هېوادونو ترمنځ د اړیکو او تعامل نوې پاڼه پرانستل شي.

له بل لوري د ایران د بهرنیو چارو وزارت د سویلي اسیا عمومي مدیر سید رسول موسوي په لندن کې د افغانستان سفارت تړل کېدو ته په اشارې سره دغه اقدام له اسلامي امارت سره د اړیکو عادي کېدو لپاره د اروپايي هېوادونو د هڅو نښه بولي.

نوموړی وايي: “اروپا کې د افغانستان د سفارتخونو تړل کېدل له کابل سره د اروپایي پلازمېنو د نژدې کېدو لپاره یو ګام دی. که څه هم دغه اقدام په ښکاره متناقضه لیدل کېږي، خو ښيي چې اروپا له اسلامي امارت سره د تعامل نوې لاره نیولې ده.”

په وروستیو کې د اسلامي امارت د بهرنیو چارو وزارت ویلي، چې په برېتانیا او یو شمیر نورو اروپایي هېوادونو کې د افغانستان له سفارتخونو او قونسلګریو څخه صادر شوي اسناد او مدارک له افغان حکومت سره د نه همغږۍ له امله نه تاییدوي.

د یادونې وړ ده، چې اوس‌مهال په یو شمېر اروپايي هېوادونو لکه: اسپانیا، هالند، بلغارستان، چک جمهوریت او د المان مونیخ کې د افغانستان قونسلګري له اسلامي امارت سره تعامل لري او خپلو فعالیتونو ته دوام ورکوي.

د عامې روغتیا وزارت وایي، مولوي نور جلال جلالي لوګر ولایت ته د سفر په ترڅ کې د نایب امین الله خان روغتون څخه لیدنه کړې.

 په دې لیدنه کې د عامې روغتیا وزیر د روغتیايي خدمتونو د بهیر څخه د لېدنې سربېره په دې روغتون کې د جدي پاملرنې څانګې د جوړېدو له چارو هم لیدنه کړې، چې په نږدې راتلونکي کې به یې د جوړېدو چارې بشپړې او ګټې اخیستنې ته به وسپارل شي.

مولوي نور جلال جلالي همداراز د یاد روغتون له مسولینو سره په دې روغتون کې د یو شمېر نورو روغتیايي برخو پر پراختیا هم خبرې کړي او دې برخې د بشپړې پاملرنې ډاډ یې ورکړی دی.

همداراز د عامې روغتیا وزیر پکتیا ولایت ته د خپل سفر په لړ کې د دې ولایت د سیمه ییز روغتون له خدمتونو لیدنه کړې.

په دې لیدنه کې مولوي نور جلال جلالي د ټولو روغتیايي څانګو د خدمتونو څخه د لیدنې برسېره د بستر ناروغانو احوال اخیستی او د خدمتونو د بهیر په اړه یې ورڅخه پوښتنې کړې دي.

 نوموړي همدارراز د یاد روغتون د تشکیل، درملو او تخصصي برخه کې د ستونزو د حل ډاډ څرګند کړ او روغتیايي پرسونل ته یې د معیاري خدمتونو د وړاندې کولو په موخه لازمې سپارښتنې کړې دي.

 د ملي دفاع وزارت وایي، د دې وزارت اړوند د ځانګړو ځواکونو فرقې په ګارنیزیون کې یو زر او ۱۴۵ عرادې بېلا بیل ډول پوځي وسایط، چې د تېرو څو کلونو را په دې خواه د یادې فرقې په اړوند جزوتامونو کې ویجاړ پراته وو، د تخنیکي ټیم له لوري ترمیم او ګټې اخيستنې ته چمتو شوي دي.

یاد وزارت زیاتوي، په دغو وسایطو کې زیات شمېر ضربتي ټانګونه، زرهي هاموې ټانګونه، رېنجر موټر، څلور ټایره موټر سایکلونه، واړه اوغټ امبولانسونه او انټرنېشنل موټر شامل دي.

د الجزیرې نړیوالې خبري شبکې د راپور له مخې، اسرائیلي یرغلګرو د غزې تړانګې سویل المواسي نومي پنډغالي کې د بې‌ځایه شويو فلسطینیانو پر خیمو برید کړی، چې له امله یې لږ تر لږه ۴۰ فلسطینیان شهیدان او ۶۰ نور ټپیان شوي دي.

د غزې د ملکي د دفاع اداره وايي، چې نن سې‌شنبه سهار د خان یونس په المواسي سیمه کې د بې‌ځایه شویو لږ تر لږه ۲۰ خېمې په نښه شوې دي.

په المواسي کې وروسته له هغه ګڼو فلسطینیانو پناه اخیستې او په خیمو کې یې ژوند پیل کړی، کله چې پر رفح او خان یونس د صهیونیستي یرغلګرو د ځمکنیو بریدونو له امله د خوندي زون په توګه اعلان شوه.

د الجزیرې عربي د راپور له مخې، په سیمه کې ژغورونکو ډلو ویلي، چې د خیمو په دې کمپ کې له برید وروسته تر ۹ مترو (۳۰ پوټه) ژورې کندې موندل شوې دي.

عیني شاهدانو په سیمه کې د ګډوډۍ او اورلګېدنې خبر ورکړی او ویلي یې دي، چې اسرائیلي جاسوسي الوتکې په شاوخوا الوتنې کوي.

د افغانستان برېښنا شرکت عمومي اجراییوي رییس ډاکټر عبدالباري عمر د اتریش او چک سلواکیا هېوادونو له دوو پانګوالو سره په افغانستان کې د بادي، لمریزې، حرارتي او اوبیزې برېښنا په برخه کې د پانګونې په تړاو هر اړخیزې خبرې کړي.

د برېښنا شرکت عمومي اجراییوي ریيس یادو پانګوالو ته په خطاب ویلي، اوس مهال په افغانستان کې د بشپړ امنیت ټینګښت لري او په هره برخه کې په ځانګړي ډول برېښنا کې د پانګونې ښه زمینه برابره شوې او بهرني پانګوال کولی شي په ډاډه زړه دې هېواد کې په بېلا بېلو برخو کې پانګونه وکړي.

ډاکټر عبدالباري عمر زیاته کړې، له بهرنیو هېوادونو د تېرو کلونو وارد شوې برېښنا ټولې پيسې تحویل شوي او اوس مهال د مصرفي برېښنا پیسې په هره میاشت کې د منظم پلان سره سم بهرنیو هېوادونو ته ورکول کېږي.

دغه‌راز له هر اړخیزو تخنیکي او دوه اړخیزو بحثونو وروسته یادو پانګوالو لېوالتیا ښودلې، چې د ټاکلي پلان سره سم به افغانستان ته راشي او ياد مسايل به له نېږدې وڅاري.

د کرېکټ اسیايي شورا د غړو هېوادونو ترمنځ د مالیزیا پلازمېنه کولالنپور ښار کې د اسیايي هېوادونو کرېکټ اجرایه مشرانو ترمنځ ناسته وشوه.

په دې ناسته کې د اړوند هېوادونو ترمنځ پر لا ډېرې همکارۍ، په ۲۰۲۴م کال کې د کرېکټ اسیایي شورا د سیالیو، له ۲۰۲۴ تر ۲۰۳۱م کال پورې د یادې شورا د رسنیزو حقوقو او د نویو هېوادونو د غړیتوب په تړاو خبرې وشوې.

د افغانستان کرېکټ بورډ مشرتابه هم له یادې ناستې په ګټې د بېلابېلو بورډونو له مشرانو سره خبرې وکړې او د افغانستان په کوربه توب یې د یادې شورا د سترو سیالیو د ترسراوي غوښتنه وکړه او دغه راز یې د بنګله دېش له مشر سره د افغانستان په کوربه توب د راتلونکې لوبلړۍ په وخت ترسره کولو خبرې اترې وکړې.

په یاده ناسته کې چې د کرېکټ نړیوالې او اسیایي شوراګانو د مشر او د هندوستان کرېکټ د سرمنشي جې شا له لوري رهبري کېده؛ دغه راز پکې د پخوانیو ناستو د موضوعاتو د تایید، د ۲۰۲۶م کال په اسیایي لوبو کې د کرېکټ پر شمولیت، د اوزبیکستان، منګولیا او فلیپین د غړیتوب د غوښتنې د ارزونې او نورو اړوند موضوعاتو په تړاو خبرې اترې وشوې.

همدارنګه په دغه ناسته کې د کرېکټ اسیايي شورا د پرمختیا کمېټې غړو د ۲۰۲۵ او ۲۰۲۶ کلونو د پلانونو او سیالیو په تړاو د غړو هېوادونو له مشرانو سره هر اړخیز معلومات شریک کړل، چې په پایله کې یو ځل بیا د کرېکټ اسیایي شورا د غړیتوب لرونکو هېوادونو ترمنځ پر لا ډېرې همکارۍ ټینګار وشو.

د افغانستان کرېکټ بورډ مشرتابه یاده ناسته د ادارې او افغانستان لپاره ډېره ګټوره بولي، چې په لړ کې یې له بېلابېلو هېوادونو سره هر اړخیزې خبرې وشوې او دغه راز ګډونوالو ته په هېواد کې د کرېکټ د لا ډېر پرمختګ راپور وړاندې شو.

د چاپېریال ساتنې ملي ادارې عمومي رییس مولوي مطیع الحق خالص د ترکیې له سفیر جنک اونال  سره په خپل کاری دفتر کې لیدنه کړې.

د چاپېریال ساتنې ملي ادارې عمومي رییس مولوي مطیع الحق خالص د ترکیې سفیر هرکلی کړی او پر بېلا بیلو چاپېریالي موضوعاتو یې خبرې کړي.

مولوي مطیع الحق خالص ویلي؛ افغانستان او ترکیه دوه دوست هېوادونه دي، چې له تاریخي پلوه ډېرې نژدې او ښې اړیکي لري او موږ به دې اړیکو پاللو او ګډو همکاریو ته دوام ورکړو.

نوموړي زیاته کړې؛ اقلیمي بدلون او چاپېریال یوه مهمه او نړیواله موضوع ده او دې اهمیت ته په کتو د چاپېریال ساتنې ملي اداره د ټولو نړیوالو کنوانسینونو تعهداتو ته ژمنه ده، په داسې حال کې چې نړیوال د چاپېریالي مسایلو په برخه کې له افغانستان سره اړینه همکاري نه کوي.

د چاپېریال ساتنې ملي ادارې عمومي رییس ویلي، افغانستان د اقلیمي بدلون له ناوړه اغېزو څخه زیات اغېزمن شوی، چې په هېواد کې غیر موسمي بارانونه، طبیعي پیښي او خطرناکه سېلابونه یې له عمده لاملونو څخه ګڼل کیږي.

ښاغلي خالص څرګنده کړې موږ هیله لرو، د ترکیې هېواد سره د چاپېریالي موضوعاتو، د تکنالوژیو او تجاربو د انتقال او ظرفیت لوړونې په برخه کې ګډې همکارۍ ولرو او د دواړو هېوادونو ترمنځ د همکارۍ هوکړه لیکونه لاسلیک شي.

د ترکیې سفیر جنک اونال د چاپېریال ساتنې ملي ادارې له عمومي رییس څخه مننه کړې او ویلي یې دي، د افغانستان او ترکیې تر منځ له پخوا څخه دوستانه او تاریخي اړیکې وې او موږ غواړو، چې د افغانستان له حکومت سره خپلو ګډو همکاریو ته دوام ورکړو.

نوموړي زیاته کړې، هېواد یې له افغانستان سره د چاپېریالي مسایلو په برخه کې ملاتړ او همکارۍ ته چمتو دی او هڅه به یې دا وي، چې په چاپېریالي او نورو مسایلو کې د افغانستان له حکومت سره مرسته او همکاري وکړي.

جنک اونال ویلي؛ موږ به ستاسو غوښتنې له خپل هېواد سره شریکي کړو او هڅه به مو داوي چي څنګه وکولی شو د اقلیمي بدلون په برخه کې خپل مشورې، تجربې او ګډو همکاریو ته له تاسو سره دوام ورکړو.