د افغانستان وزلوبې لیګ څلورم پړاو سیالیو کې د ۱۲ ولایتونو لوبډلې یو د بل پر وړاندې ولوبېدې، چې پایلوبه یې د سمنګانو ولایت لوبډلې پخپل نوم ثبت کړه.
په دې پړاو سیالیو کې کندوز بلخ ته او سمنګان نورستان لوبډلې ته په ماتې ورکولو سره پایلوبې ته لاره ومونده.
نن چهار شنبه کندوز او سمنګان لوبډلو په پایلوبه کې په زړه پورې لوبه وکړه، چې په پایله کې یې دا پړاو سیالۍ د سمنګان لوبډلې په اتلولي پای ته ورسېدې.
سمنګان لوبډې ۶ او کندوز ۴ امتیازونه خپل کړل، چې سمنګان یې د دوو امتیازونو په توپیر اتلولي وګټله.
د یادولو وړ ده چې د وزلوبې تر څنګ د نېزه بازۍ سیالۍ هم ترسره شوې چې اتلولي یې پکتیکا پخپل نوم کړه.
د دې لوبو نندارې ته د هېواد له بېلا بېلو ولایتونو ګڼ شمېر لیدونکي راغلي وو.
د وزلوبې څلورم پړاو لیګ سیالۍ چې یوولس ورځې یې دوام وکړ، له ملي سپورټ تلویزیون او زموږ له ټولنیزو رسنیو په ژوندۍ بڼه خپرېدې.