د بدخشان ولایت واخان ولسوالۍ پاميري هېوادوالو ته د ۴۰ ميلونه افغانيو په لګښت د لمړني روغتيايي مرکز پرانستل شوی
ياد روغتيايي مرکز چې د مسلکي روغتیايي پرسونل په شتون کې به د بدخشان ولایت واخان ولسوالۍ په پامير سيمه کې د ميشتو هيوادوالو لپاره روغتيايي خدمات وړاندې کوي، په تيره يوه پيړۍ کې د ياد قوم لپاره لومړنی معياري جوړ شوی روغتیايي مرکز دی.
ځايي اوسیدونکو د عامې روغتيا وزارت له رهبرۍ او په ټوله کې د افغانستان اسلامي امارت څخه مننه کړې، چې د اسلامي نظام په راتګ سره يې تر ډيرو حقوقو ته رسیدنه شوې او لا کارونه روان دي.
د عامې روغتيا وزارت مالي او اداري مرستیال مولوي محمد اسحق صاحبزاده د ياد روغتيايي مرکز د پرانستې پر مهال ویلي، اسلامي امارت د هېواد ټولو وګړو ته د خپلو حقوقو ورکولو او روغتيايي خدماتو وړاندې کولو لپاره ژمنتيا لري.
نوموړي زیاته کړې؛ زمونږ هڅه همدا ده، چې د هېواد تر هر وګړي معياري روغتيايي خدمات وړاندې کړو.
ښاغلي صاحبزاده ویلي؛ د عامې روغتيا وزارت نه يواځې په واخان کې، بلکې د هېواد په ټولو لرې پرتو سیمو کې همدې ته ورته عملي کړنو ته ژمنتیا لري او دا یې هېوادوالو ته يې په عمل کې ثابته کړې.
د عامې روغتيا وزارت مالي او اداري مرستیال زیاته کړې، په نږدې وختونو کې به په همدې روغتیايي مرکز کې د جراحي متخصص او ځينې نورو روغتيايي کار کوونکو ګومارنه هم تر سره شي، ترڅو وکولای شي همدلته زمونږ د پامير ميشته هېوادوالو ستونزې حل کړي.