د بلخ والي محمد یوسف وفا د دغه ولایت له یو شمېر سوداګرو او دولتي مسولینو سره د همغږۍ ناستې پر مهال یو شمېر لوړ پوړو چارواکو، ګڼ شمېر صنعتکارانو، ملي سوداګرو، د اتحادیو رییسانو ګډون درلود، چې واړو لورو د هرات د زلزله ځپلو کورنیو سره د مرستې راټولولو په پار د ګډې کمیټې جوړولو ترڅنګ په یو لړه مهمو موضوعاتو خبرې کړي.
د غونډې ګډونوالو د دغه غمیزې پیښې زیانمنو ته دعاوې کړي او ویلي يي دي؛ چې دا زمونږ ملي او وجداني وجیبه ده، چې د خپلو هېوادوالو ترڅنګ به په سختو شرايطو کې دریږو او ورسره مرسته به کوو.
نوموړو زیاته کړې؛ چې د افغانستان هر وګړی په دغې غمیزې پیښې باندې غمجن دی او مونږ ټول باید ژړ تر ژړه خپلې مرستې ولیږو، ترڅو د هرات میشت زلزله ځپلې کورنۍ له بیړنیو حالاتو څخه ووځي او بیرته خپل نورمال ژوند ته راوګریږي.
د بلخ والي ویلي؛ چې مونږ ټول مسلمانان باید د یو بل سره په سختو شرايطو کې مرستې ونه سپموو.
د نوموړي په لارښوونې یې یوه ګډه کمېټه ټاکل شوې، ترڅو د هرات د زلزله ځپلو لپاره په کې بیړنۍ مرستې راټولې او تر زیانمنو کسانو یې ورسوې.
ښاغلي وفا یادو ملي سوداګرو ته د هر ډول همکاریو ډاډ ورکړی.