د المپیک ملي کمېټې او سپورټ عمومي ریيس مولوي احمدالله وثیق د میدان وردګ ولایت له والي قاري بختیار معاذ سره لیدنه کړې او په دې ولایت کې د ورزش د پراختیا او بهبود په اړه يې هر اړخیزې خبرې کړي.
مولوي احمدالله وثیق ویلي؛ ټولو ولایتونو ته په متوازن ډول د ورزشي فعالیتونو رسول مو اساسي هدف دی، خو ډېره هڅه مو هغو وروسته پاتې ولایتونو او هغو سیمو ته ده، چې په تېر کې ورته خاص پام نه دی شوی.
ښاغلي وثیق زیاته کړې؛ موږ هڅه کوو، چې هغه سیمهييزې او دودیزې لوبې بیا را ژوندۍ کړو، چې په دې وروستیو کې له پامه غورځېدلي او د نه پاملرنې له امله د ورکېدو په حال کې دي.
نوموړي د میدان وردګ ولایت له والي غوښتي، چې د یاد ولایت له ورزشکارانو سره په اړوندو برخو کې تر ممکنې کچې همکاري وکړي.
د میدان وردګ ولایت والي هم ژمنه کړې؛ چې هڅه کوي، تر خپلې وسې د ورزشکارانو ملاتړ وکړي او په اړوندو څانګو کې ورسره مرسته وکړي.
د المپیک ملي کمېټې او سپورټ عمومي ریيس د میدان وردګ ولایت د بدني روزنې او سپورټ امریت له کارمندانو سره تر لیدنې او هغوی د ستونزو او مشکلاتو تر اورېدلو وروسته، د یاد امریت له ودانۍ او ورزشي ځایونو هم لیدنه کړې.