د عامې روغتيا وزارت د مالي او اداري چارو مرستيال مولوي محمد اسحاق صاحبزاده د UNFPA ادارې د اسيا حوزې لپاره مسول پيو سميت او په افغانستان کې د يادې ادارې نوي راتلونکي مسول کوابينا اسنتي سره ليدنه کړې.
د عامې روغتيا وزارت مالي او اداري چارو مرستيال د يادې ادارې د روغتيا په برخه کې د کارونو او فعاليتونو په اړه له اړوندې ادارې مننه کړې او د نويو روغتيايي ځالو د ارتقا او کارکوونکو د زياتوالي په اړه بحث او خبرې کړي.
ښاغلي صاحبزاده زياته کړې، دا چې په ټول هېواد کې مو امن دی، هره نړيواله اداره چې د روغتيا په برخه کې کار کوي مونږ ورته د کار زمينه برابره و؛ تر څو د هېوادوالو لپاره مو معياري روغتيايي خدمات وړاندې شي او د هغه سيمو خلک له روغتيايي خدمتونو برخمن شي، چې په تېرو ۲۰ کالو کې ورته هېڅ پاملرنه نه ده شوې.
د UNFPA ادارې د اسيا حوزې مسول د عامې روغتیا وزارت له تل پاتې همکارۍ مننه کړې او د روغتیا په برخه کې د لا زياتې همکارۍ او همغږۍ ژمنتیا څرګنده کړې.