د چاپېریال ساتنې ملي ادارې پالیسي او مسلکي مرستیال ډاکټر زین العابدین عابد په افغانستان کې د ملګرو ملتونو د خوړو او کرنې سازمان له رییس ریچارډ او مل پلاوي سره له اقلیمي بدلون سره د مبارزې او جوړښت په برخه کې د نړیوالو چاپېریالي اسانیاوو اتم پړاو کې د افغانستان سهمیې (STAR) ته د لاسرسي او همدا راز د (GEF-6 & GEF-7) پروژو د پلي کولو په هکله خبرې کړي.
په لیدنه کې د اقلیمي بدلون له ناوړه اغیزو څخه د افغانانو د زیامن کیدو، موجوده مالي امکاناتو ته د لاسرسي، شته فرصتونو او ګډي همغږۍ او همکارۍ په تړاو هر اړخیزې خبرې شوي.
د چاپېریال ساتنې ملي ادارې پالیسي او مسلکي مرستیال ویلي؛ چاپېریالي موضوعات باید سیاسي نه شي، ځګه چې زیان یې یوازې ولسونو ته رسیږي.
نوموړي زیاته کړې؛ موږ په داسې موضوع خبرې کوو، چې د نړۍ ډیر هېوادونه یې کړولي او له نړیوالو موسسو څخه مو هیله دا ده، چي د اقلیمي بدلون په برخه کې له افغانستان سره خپلو مرستو او همکاریو ته دوام ورکړي.
ښاغلي عابد ویلي؛ افغانستان د نړۍوالو مالي میکانیزمونو څخه د پروژو د ترلاسه کولو په برخه کې له بندیزونو سره مخ شوی او یوازې د اقلیم زرغون صندوق GEF څخه د ۳۰دیرش میلیونو ډالرو په ارزښت تر کار لاندې پروژې ځنډول شوي، چې په دې سره د اقلیمي بدلون په برخه کې افغانستان له ډیرو ننګونو سره مخ شوی دي.
د چاپېریال ساتنې ملي ادارې مسلکي مرستیال د FAO له رییس غوښتي؛ چې د نړیوالو چاپېریالي اسانیاوو اتم پړاو (STAR) کې د افغانستان سهمیه کې لس میلیونه ډالر موجود دي، چې د لومړیتوبونو په پام کې نیولو سره د دې ادارې د تخنیکي ټیم سره په ګډه باید پروژې ډیزاین او مودجوده پیسې ترلاسه کړي.
د ملګرو ملتونو د خوړو او کرنې سازمان (FAO) رییس ریچارډ د خپلو فعالیتونو په تړاو هر اړخیزې خبرې کړي او ژمنه یې کړې، چې د چاپېریال ساتنې ملي ادارې سره به خپلې اړیکې پیاوړې کوي او ګډ کار کولو ته به دوام ورکوي.
نوموړي ویلي؛ موږ په دوامداره توګه هڅې کړې دي، چې د اقلیمي بدلون په برخه کې د افغانستان ستونزې تر نړیوالو ورسوو، ځکه چې افغانستان اقلیمي بدلون سخت ځپلی او ټول افغانان یې متضرر کړي دي.
ریچارډ زیاته کړې؛ چې د (STAR) څخه به لس میلیونه ترلاسه کېدونکي ډالر د اوبو لګولو، څړځایونو د ساتنې او د ځنګلونو د بیا رغونې په برخه کې مصرف کړي.
دواړو خواو په ګډ کار او د همغږۍ پر پیاوړتیا هوکړه کړې او د پروژو د پیل او تخنیکي همکارۍ لپاره ګډ کاري ټیم وټاکل شو، چې د افغانسان د لومړيتوبونو په پام کې نیولو سره به پروژې ډیزاین او عملي کړي.