د ریاست الوزرا سیاسي مرستیال مولوي عبدالکبیر په خوست کې له علماوو او قومي مخورو سره د لیدنو په دوام، د زینخیل قوم یو شمېر قومي مشرانو او علماوو سره لیدنه کړې.
د زینخیل قوم علمای کرامو او مشرانو اسلامي امارت ته د خپل ملاتړ ډاډ ورکړی او ویلي يي دي؛ لرې پرتو سیمو ته د اسلامي امارت د مشرانو ورتګ او د خلکو د ستونزو په اورېدلو سره د خلفای راشدینو تاریخ را ژوندی شوی دی.
هغوی زیاته کړې، په هېڅ ډول چاته د حکومت ضد کړنو اجازه نه ورکوي او په پوره توان له نظام څخه دفاع کولو ته چمتو دي.
د زینخیلو مشرانو او علماوو په خوست کې د برېښنا، روغتیا، پوهنې او سړک رغولو په برخه کې د اساسي پروژو د پلي کولو غوښتنه وکړې او خپل لیکلي وړاندیزونه یې د ریاست الوزرا سیاسي مرستیال سره شريک کړي.
د ریاست الوزرا سیاسي مرستیال ویلي؛ دا د ولسونو حق او د اسلامي امارت مسولیت دی، چې د ولس ستونزې حل او ورته اړین خدمتونه ترسره کړي.
مولوي عبدالکبیر زیاته کړې؛ قومي مشرانو په تېرو څو لسیزو کې د جهاد او ملي یووالي ساتلو په برخه کې بې سارې هڅې کړې دي چې له برکته یې افغانستان له اشغاله خلاص شوی.
نوموړي د خپلو خبرو په پای کې ویلي؛ د زینخیلو د ستونزو د حل لپاره به اساسي اقدام وکړي او پر وخت د رسېدنې لپاره به يې غوښتنې او وړاندیزونه اړوندو ادارو سره همغږي کړي.