افغانستان کرېکټ بورډ نیکولاس ټرېور لي د ملي لوبډلې لپاره د فزیکي تکړښت د نوي روزونکي يا ټرېنر په توګه وګوماره، چې د روانې فبروري میاشتې په ۲۳مه نېټه به د ایرلینډ پر وړاندې له لوبلړۍ مخکې له ملي لوبډلې سره یوځای شي.
له دې وړاندې یاده دنده له ۲۰۱۴م کال راهیسې د سویلي افریقا جېسن ډوګلس پر مخ وړله.
۴۰ کلن نیکولاس لي د انګلستان د کېنټ کاونټي کرېکټ کلب په ګټه ۱۳ فرسټ کلاس سیالیو کې لوبېدلی دی، چې د درې نیمه سلیزو پر مټ یې د ۳۰.۶۲ منډو په اوسط سره ۴۹۰ منډې جوړې کړې دي.
نوموړی دغه راز له انګلستان کرېکټ بورډ د روزنې دویمه درجه سند ترلاسه کړی او د فزیکي تکړښت د روزونکي په توګه پراخه تجربه لري.
ټرېور لي د ۲۰۲۰م کال له مارچ میاشتې راهیسې د بنګله دېش کرېکټ بورډ د فزیکي تکړښت څانګې د مشر په توګه دنده ترسره کوي.
نیکولاس له دې وړاندې د ۲۰۱۶م کال له اکټوبر د ۲۰۲۰م کال تر فبروري میاشتې پورې د سریلانکا کرېکټ ملي لوبډلې د فزیکي تکړښت د روزونکي په توګه پاتې شوی دی.
له بنګله دېش او سریلانکا سره له دندو وړاندې نوموړي د شا وخوا پینځه کلونو لپاره د انګلستان د سسیکس کرېکټ کلب د فزیکي تکړښت د مشر روزونکي په توګه دنده پرمخ وړې ده.
سربېره پر دې نوموړی د انګلستان له اګلیا رسکن پوهنتون د سپورت ساینس په برخه کې د لېسانس تر کچې زده کړې ترلاسه کړې او دغه راز د انګلستان د فزیکي تکړښت د سازمان برحاله غړیتوب هم له ځان سره لري.
د دې ټولو مسولیتونو او دندو ترڅنګ نیکولاس ټرېور لي د ۲۰۱۷م کال چېمپینز ټرافي، د ۲۰۱۹م کال نړیوال جام، د ۲۰۲۱ او ۲۰۲۲ کال د شل اوریزو سیالیو نړیوال جام او همدارنګه د ۲۰۲۳ کال د یو ورځنیو سیالیو نړیوال جام کې له بېلابېلو لوبډلو سره د فزیکي تکړښت د روزونکي په توګه دندې ترسره کړې دي.
د یادونې وړ ده، چې په دې وروستیو کې د افغانستان کرېکټ بورډ شېن مکډرمټ د ملي لوبډلې د ډګر ساتنې روزونکي په توګه ګمارلی دی.
دغه راز افغانستان کرېکټ بورډ د ملي لوبډلې لپاره د کارکردګۍ څېړنې برخه کې هم د روزونکي په لټه کې دی، چې یاد بست یې اعلان ته هم سپارلی دی.