د افغانستان کرېکټ بورډ د غوراوي کمېتې نن د سریلانکا پر وړاندې د راتلونکو دریو نړیوالو ۲۰ اوریزو سیالیو د لوبلړۍ په موخه د افغان لوبډلې نوملړ په ډاګه کړ، چې لومړۍ لوبه به یې د روانې فبروري میاشتې په ۱۷مه ورپسې دویمه او دریمه په ترتیب سره په ۱۹مه او ۲۱مه نېټه ترسره شي.
د یادې لوبډلې مشري به د ابراهیم ځدراڼ پر غاړه ولري.
په یاد نوملړ کې د ابراهیم ځدراڼ په لوبډلمشرۍ، رحمن الله ګربز (ویکټ ساتونکی)، محمد اسحاق (ویکټ ساتونکی)، حضرت الله ځاځی، ګلبدین نایب، محمد نبي، نجیب الله ځدراڼ، عظمت الله عمرزی، کریم جنت، شرف الدین اشرف، فضل الحق فاروقي، فرید احمد، نوین الحق، نور احمد، وفادار مومند او قیس احمد ګډون لري.
د افغانستان کرېکټ بورډ د غوراوي کمېټې سرپرست مسول احمدشاه سلیمانخېل ویلي؛ د دغو سیالیو اهمیت ته په پام سره به زموږ یوه موخه دا هم وي، ترڅو د ۲۰ اوریزو سیالیو نړیوال جام هم له نظره ونه باسو او له اوسه ورته د سینیر لوبغاړو ترڅنګ ځوانان هم په پام کې ونیسو او وروزو.
دغه راز د افغانستان کرېکټ بورډ اجراییوي مشر نصیب خان ځدران ویلي؛ تل مو په دې ټینګار کړی، ترڅو ټولو بڼو ته باید پياوړي لوبغاړي په پام کې ونیول شي، دغه راز لوبډلو ته د ځوانانو شاملول هم زموږ له مسولیتونو ګڼل کېږي، چې تر اوسه دغه چاره هم په ښه او سیستماتیک ډول مخ ته تللې ده او دغه راز زموږ ډېر فکر پر یوې غوره پشتوانې او بککپ لوبډلې هم ده ،چې باید هیڅکله دغه کار له پامه یې ونه غورځوو.
نوموړي زیاته کړې؛ بایلل او ګټل د لوبې دوه اړخونه دي، خو خوښ دې ته یم، چې موږ ملي لوبډلو ته بوخت مهالوېش تنظیم کړی دی او دا به مو تل لومړیتوب وي، ترڅو ملي لوبډله بوخت کال ولري چې له نېکه مرغه سږ کال یې یوه ښه بېلګه ده.
د یادونې وړ ده چې افغان ملي لوبډله به د سریلانکا پر وړاندې له یادې لوبلړۍ وروسته د افغانستان په کوربه توب د ایرلنډ پر وړاندې بشپړه لوبلړۍ ترسره کړي، چې یوه ټېسټ، درې یو ورځنۍ او درې نړیوالې شل اوریزې لوبې پکې شاملې دي.