د ریاست الوزرا سیاسي مرستیال مولوي عبدالکبیر د ننګرهار ولایت د اچین ولسوالۍ له یوشمېر قومي مشرانو سره لیدنه کړې.
په دې ناسته کې د اچین ولسوالۍ قومي مشرانو د سرتاسري امنیت له تامین څخه خوښي ښودلې او ویلي يي دي، چې دا مهال د اچین ولسونه په کامل امنیت کې ژوند کوي اوخپلې ورځنۍ چارې پر مخ وړي.
هغوی زیاته کړې، دوی له اسلامي امارت سره هر راز همکارۍ ته چمتو دي او د اسلامي نظام د راتګ لپاره یې قربانۍ ورکړي دي.
د اچین ولسوالۍ یادو مشرانو دغه راز په دغې ولسوالۍ کې د پراختیايي چارو د ترسره کېدو غوښتنه کړې او ویلي يي دي؛ د کلنیکونو، ښوونځيو، برېښنا او نورو پراختیايي چارو د کمښت له امله خلک له ستونزو سره مخ دي.
د ریاست الوزرا سیاسي مرستیال ویلي، د دې ولسوالۍ اوسېدونکیو هم اشغالګرو او هم د فتنه ګرو ډلو له لوري درانه زیانونه لیدلي او د اسلامي نظام لپاره یې ورکړې قربانۍ او زحمتونه له چا هېر نه دي.
مولوي عبدالکبیر زیاته کړې؛ اسلامي نظام د افغانستان د ولسونو له منځه را پورته شوی نظام دی، چې د مالکیت حس یې ټولو افغانانو ته ورګرځي او موخه یې د اسلامي نظام عملي کول او د خلکو لپاره خدمت کول دي.
نوموړي زیاته ویلي، چې د اچین ولسوالۍ د ستونزو د حل لپاره به اړونده ادارو ته لازمې سپارښتنې وکړي.