د رياست الوزرا اداري مرستيال مولوي عبدالسلام حنفي د سپين زر کارخونې له ریيس او یو تن ملي سوداګر سره لیدنه کړې.
د سپين زر کارخونې ریيس په هېواد کې د اقتصادي او سوداګريز وضعيت په ښه کېدو يې خوښي ښودلې.
نوموړي د ټولو هېوادوالو او په ځانګړي ډول د سوداګرو او پانګه والو د ځاني او مالي امنيت پر تأمين خوښي ښودلې او ویلي يي دي؛ هېواد کې اقتصاد او پانګونې ته د ښې زمينې برابرول د دې لامل شوي، چې کورني او بهرني سوداګر او پانګه وال په افغانستان کې پانګونه وکړي.
هغوی همداراز د اسلامي امارت رهبرۍ څخه غوښتي، ترڅو د کورنيو توليداتو ملاتړ او په مختلفو برخو کې پانګونې ته ځانګړې پاملرنه وکړي.
مولوي عبدالسلام حنفي ویلي، اسلامي امارت د ټولو هېوادوالو د امنيت ټیګښت او د اقتصادي او پانګونې زمينو پراختيا لپاره له هېڅ ډول هڅو درېغ نه کوي.
د رياست الوزرا اداري مرستيال زياته کړې؛ اسلامي امارت په هېواد کې د ټولو پانګونو هرکلی کوي، ټولو سوداګرو او پانګه والو ته لازمې اسانتیاوې برابروي.
نوموړي همداراز په بهر کې له ټولو مېشتو افغان سوداګرو غوښتي، ترڅو بېرته خپل هېواد ته راستانه شي او په ابادۍ او پرمختګ کې يې برخه واخلي.