د افغانستان اسلامي امارت چارو ادارې لوی ریاست د څارنې او پالیسۍ مرستيال مولوي عبدالولي حقاني د صادراتي سندونو د طی مراحل کېدو مرکز پریکړهلیک د اړوندو ادارو معینانو، د چارو ادارې لوی رياست د پانګونې اسانتیا ریيس په شتون کې له صنعت او سوداګرۍ وزارت او د افغانستان د سوداګرۍ او پانګونې خونې سره لاسلیک شو.
دغه غونډه د صنعت او سوداګرۍ، مالیې، کرنې اوبو لګولو او مالدارۍ، کانونو او پټرولیم، وزارتونو معینانو، د افغانستان د سوداګرۍ او پانګونې خونې سرپرست او د ملي موزیم ریيس په ګډون ترسره شوه.
د چارو ادارې لوی ریاست د څارنې او پالیسۍ مرستيال مولوي عبدالولي حقاني ویلي؛ اړتیا ده چې د افغانستان اسلامي امارت په چوکاټ کې راسپارل شوې دندې په صداقت او اخلاص سره پای ته ورسوو.
نوموړي زیاته کړې، تر دې وړاندې زمونږ سوداګر له ډېرو ستونزو سره مخ وو او د داسې مراکزو له جوړېدو سره به دوی ته ډېرې اسانتیاوې برابرې شي.
دې غونډه کې د چارو ادارې لوی رياست د پانګونې اسانتیا رییس انجنیر احمد ضیاء خالد د صادراتي سندونو د طی مراحل کېدو مرکز په جوړېدو کې د اړوندو ادارو له همکارۍ مننه کړې او د تفاهملیک په اړه یې معلومات وړاندې کړي.
د صنعت او سوداګرۍ، ګمرکاتو او کانونو او پټرولیم وزارتونو معینانو د سندونو د طی مراحل کېدو مرکز جوړېدل ګټور بللي او ویلي يي دي، ې د دې مرکز په جوړېدو سره به سوداګرو ته ډېرې اسانتیاوې برابرې شي.
د افغانستان د پانګونې او سوداګرۍ خونې سرپرست محمد یونس مهمند د اقتصادي کمیسیون له فعالیتونو د مننې ترڅنګ ویلي، د دې مرکز په جوړېدو سره به د فساد مخنیوي وشي او د هېواد د صادراتو کچه به معلومه شي.
نوموړي له اسلامي امارت څخه غوښتي ترڅو د هېواد صادراتو ته ځانګړې پاملرنه وکړي.