د کرنې، اوبو لګولو او مالدارۍ سرپرست وزیر مولوي عطاء الله عمري په مشرۍ د افغانستان د تخنیکي پلاوي او د ازبیکستان د اوبو د منابعو وزیر شوکت همرایوف په مشرۍ د یاد هېواد د تخنیکي پلاوي مشترکه غونډه شوې.
د غونډې په پیل کې د ازبیکستان د اوبو د منابعو وزیر شوکت همرایوف د افغانستان د مېلمه پالنې مننه کړې او ویلي يي دي، د افغانستان هر ډول پراختیا او پرمختګ ته د ازبیکستان د حکومت او خلکو خوشحالیږي.
نوموړي زیاته کړې؛ موږ باوري یوو چې افغانستان یو ښه همکار دی، دغه راز د دواړو دوستو هېوادونو ترمنځ لرغونو مشترکاتو ته په پام د قوش تیپې کانال پروژه کې هر ډول همکارۍ ته چمتو یوو.
د ازبیکستان د اوبو د منابعو وزیر ویلي؛ هېواد یې د بندونو، کانال جوړولو، کرنې، اوبو لګولو او د اوبو د مدیریت په برخه کې د وسایلو په تولید کې د سیمه په کچه تجربه لري او په دې برخه کې له افغانستان سره هر ډول همکارۍ ته تیار دی.
د کرنې، اوبو لګولو او مالدارۍ سرپرست وزیر مولوي عطاء الله عمري د ازبیکستان د مرستو او همکاریو مننه کړې او ویلي يي دي؛ افغانستان د داخلي جنګونو له امله ونه توانید چې د ازبیکستان په شمول د نورو ګاونډیانو د ګاونډیتوب حق ادا کړي، اما د اسلامي امارت له حاکمیت راوروسته اوس په هېواد کې سرتاسري امنیت ټینګ شوی، چې د نړۍ ټولو هېوادونو په ځانګړي ډول د افغانستان ګاونډیانو ته په بېلابېلو برخو کې د همکارۍ زمینه برابره شوې ده.
نوموړي څرګنده کړه، موږ په بېلابېلو برخو کې ستاسو له تجربو استفاده کوو او د هېواد په ټولو په ځانګړي ډول د برېښنا د تولید، کرنې او د اوبو د مدیریت په څېر نورو برخو کې ستاسې همکاریو ته اړتیا لرو.
د غونډې په پای کې دواړو پلاویو د کرنې، اقتصاد، د اوبو مدیریت او د اوبو زېرمه کولو د سېستم په برخو کې تخنیکي بحثونه کړي دي.