د پوهنې وزارت وایي؛ مولوي حبیب الله اغا د ښوونیز وضعیت د څېړلو، ارزولو په موخه لوګر ولایت ته سفر کړی.
یاد وزارت زیاتوي؛ مولوي حبیب الله اغا د خپل سفر په لړ کې د حضرت عمر فاروق رض د هلکانو لېسې، فاروقیه دیني مدرسې او د حضرت امیر حمزه رض مرکزي درالایتام څخه د لیدنې پرمهال، د یادو تعلیمي بنسټونو د زده کړو بهیر یې له نږدې ارزولی.
مولوي حبیب الله اغا له طالب العلمانو او زده کوونکو څخه ښوونیزې پوښتنې کړي، سم ځواب ویونکو طالب العلمان او زده کوونکي یې په نغدي جایزو ستایلي او هم یې د زده کوونکو او طالب العلمانو ښوونیزې غوښتنې او ستونزې اورېدلې.
د دې ترڅنګ د پوهنې وزیر د یاد ولایت د پوهنې ریاست د غونډو په تالار کې د دې ریاست د مسولینو او کارکوونکو په جوړه شوې غونډه کې هم ګډون کړي.
مولوي حبیب الله اغا په ښوونیز ډګر کې د پوهنې ریاست د مسولینو، کارکوونکو او ښوونکو هڅې ستایلي او د دغه ریاست مسولین ، کارکوونکي او ښوونکي یې لا هڅولي، تر څو د پوهنې بهیر د لا ښه والي په موخه خپلې هڅې پراخې کړي.